Eksitoso Miss Press 2024 di Curaçao International Crowned Queens

Kandidatanan pa Miss Teen Curaçao International 2024 a keda ofisialmente presentá

 

Willemstad, 6 di yüli 2024 – Curaçao International Crowned Queens (CICQ) orguyosamente a presentá ofisialmente su seis (6) kandidatanan pa su gran sertámen Miss Teen Curaçao International 2024. Durante e evento Miss Press, den un sala kargá ku famianan, amistatnan i amantenan di e mundu di beyesa en general, e organisashon a brinda un anochi espektakular durante kua e partisipantenan a skohe tambe nan numerashon ofisial p’e sertamen. Kada un di nan a lusi riba esenario, apoyá pa nan fanatikada aya den sala di Renaissance Wind Creek Curaçao Resort.

E seis damitanan ku lo duna tur di nan durante e lunanan bendiero ta: Saray Alvarez Ramirez representando Jan Sofat; Lusmaily Bekeer representando Mahuma; Rayenne Kirindongo representando Santa Maria; Kristal Mercera representando Santa Rosa; Xiandrah Statia representando Tera Kora; Lyze-Annah Stewart representando Saliña.

 

Partisipantenan a hiba entrevista ku huradonan kua a konsistí di profeshonalnan di e mundu di periodismo i media. Esakinan por a sera konosí ku e kandidatanan i por a husga riba entre otro abilidat komunikativo, ekspresivo, sinseridat/spontaneidat, konosementu general, i tambe durante presentashon riba esenario. Abase di esaki a skohe e ganadó di e título máksimo p’e anochi, esta ‘Miss Press’. Esaki a resultá di ta señorita Xiandrah Statia. CICQ tambe a otorgá título di ‘Miss Dynamic’ pa mas karchinan bendí p’e evento di Miss Press. Esaki tambe e damita Xiandrah a sa di konkistá. Meta di e premio aki ta pa e sirbi komo estímulo pa kada un partisipante yuda engrandese su mes fanatikada i e oudiensia pa Miss Teen Curaçao International den su totalidat.

 

CICQ ta para pa i kere den un formashon holístiko di kada un partisipante, ku e meta pa kada un yega nan máksimo potensial. Ta trata di muchu mas ku simplemente enfoká riba e beyesa físiko. Atenshon ta ser duná na e parti emoshonal, sosial i fortifikashon di e parti mental. Miss Teen Curaçao International ta forma hóbennan femenino kompetitivo ku lo bira ‘role model’ i lider ku ta sigur di nan mes. Fortifiká rèspèt, disiplina; promové edukashon i puntualidat; motivá pa deskubrí talentonan personal, pa kompartí ku humildat mientras ta inkulká patriotismo, ta sigur e meta.

 

P’esei di mes manera ku edishonnan anterior, kada partisipante manera menshoná, ta representando su bario/área di residensia ya ku di e forma aki, e organisashon ta deseá di pone e enfoke riba e laso komunitario entre kada un hobensita i su entorno diario pafó di su hogar. Durante añanan por a tuma nota ku e laso aki no ta loke ku e tabata siendo ku esaki ta fundamental den desaroyo di nos hóbennan i pa ‘nation building’.

 

Loke ta destaká e organisashon aki su sertamen di beyesa ta e enfoke riba proyekto ku temanan ku ta toka nos komunidat. E aña aki a skohe pa unu ku ta aktual i ku ta sumamente importante pa krea konsientisashon bou di hóbennan esta: prevenshon di i konsekuensia di kontrakshon ku HIV/AIDS. Kada un kandidata lo tin komo tarea pa krea su proyekto di konsientisashon i hiba esaki den komunidat, enfokando na su skol i den su bario. Pa e parti di proyekto aki, CICQ ta gradisí enormemente e kolaborashon ku organisashon PLONS; un plataforma ku tin komo meta pa konsientisá i eduká riba e tópiko di HIV/Aids aki na Kòrsou. PLONS ta proveé charlanan, kompartiendo konosementu balioso ku e damitanan, kua nan lo usa komo base pa nan proyekto. Mas tokante esaki lo bini dilanti den transkurso di e periodo.

 

Direktor di CICQ señor Gionel Virginie ta wak bèk riba un anochi eksitoso. Manera el a indiká: “E promé evento aki i e resultado sigur lo ta di gran balor pa ku kontinuashon di e preparashon di kada un partisipante. Nos ta sumamente entusiasmá pa tur loke tin di bini ainda. E agènda ta kargá. Lo ta un periodo intensivo pero sigur fruktífero.”

 

CICQ ta invitá un i tur pa apoyá nos hóbennan i sigui tur desaroyo di e sertamen aki riba plataformanan digital di e organisashon pa keda na altura tambe di demas eventonan ku ta na kaminda manera Miss Teen Curaçao International – Monarch of Beauty, e foro hubenil i anochi final ku ta primintí di bira algu inolvidabel. Pues keda pendiente pa muchu mas di e organisashon ku ta brinda mas ku simplemente ta bunita.