FUNSHON DI E ROTÒNDE NA ST. ROSA TA KEDA NORMAL PA PÚBLIKO
TRÁFIKO, TRANSPORTE I PLANIFIKASHON URBANO
FUNSHON DI E ROTÒNDE NA ST. ROSA TA KEDA NORMAL PA PÚBLIKO
PUBLIKÁ RIBA 16 YÜLI 2024
Funshon di e rotònde na St. Rosa ta keda normal pa públiko durante periodo di transporte mulinanan di bientu
Willemstad – Un di e ahustenan di mas grandi ku lo tuma lugá den periodo di transporte di e mulinanan di bientu nobo ku lo keda instalá na Koraal Tabak próksimamente, ta na altura di e rotònde di Sta. Rosa. Wikènt tras di lomba, a hasi trabounan di preparashon entre otro na altura di e rotònde di Sta. Rosa pa asina por transportá e diferente parti di e mulinanan seif pa Koraal Tabak. Pa por fasilitá e momentunan ku e trùk largu ta pasa na altura di e rotònde di Sta. Rosa, mester a temporalmente baha e haltura meimei di e rotònde i kita e bòrchinan di tráfiko. Unabes finalisá e transporte di e mulinanan pa Koraal Tabak lo bolbe pone e rotònde bèk den su estado original.
Servisio pa Obranan Públiko (UOOW), ke enfatisá ku, meskos ku a keda komuniká via Aqualectra i NuCapital anteriormente, e funshon di e rotònde na Sta. Rosa ta keda normal pa públiko general durante dia i durante e orarionan ku trùknan tin ku krusa e rotònde ku e mulinanan di bientu polis lo sera e área temporalmente i guia tráfiko. Pues, habitantenan den e área i esnan ku mester pasa di e ruta akí, por sigui trafiká normal via rotònde di Sta. Rosa durante e periodo di transporte di e mulinanan di bientu. Solamente na momentu ku e trùknan ta pasando, polis lo desviá tráfiko. Transporte di e mulinanan ta kuminsá dia 5 di ougùstùs i dor di e kantidat i grandura di e mulinanan, ta premirá ku lo tuma masoménos 1 luna pa esakinan keda transportá kompletu pa Koraal Tabak.
Porfabor trafiká ku koutela durante di e periodo benidero si akaso bo ta usa e ruta riba kua ta hasi ahustenan pa fasilitá e transporte importante akí, inkluso rotònde di Sta. Rosa. Mas ku klaro, ku lo sigui tene bo informá di tur desaroyo importante durante transporte i instalashon di nos mulinanan di bientu nobo.
E yegada i instalashon di e mulinanan di bientu akí ta un paso grandi den direkshon di energia di futuro pa Kòrsou. Energia muchu mas konfiabel, duradero i pagabel pa kada kas i negoshi den nos komunidat.
Danki pa bo pasenshi i koperashon miéntras nos ta traha inkansablemente pa por alkansá esaki.
