Videoclip di “Instrumènt” a sali!

Vivakids Recycleband ta sigui pone ambiente pa grandi i chikí
WILLEMSTAD- Despues di a lansa e kansion nobo “Instrumènt” na luna di febrüari di e aña akí,
awor VivaKids Recycleband a saka tambe e videoclip pa e kansion akí, “Instrumènt”. Un
videoclip yen di sous, koló i ritmo pa grandi i chikí manera ya ta un kustumber pa e muchanan
di VivaKids.
E kansion “Instrumènt” ta papia di un mucha ku ke traha su propio instrumènt pa pone un poko
ambiente i goso huntu ku su amigunan. Netamente loke VivaKids a bin ta hasi pa e último
añanan ku hopi sabor i zjeitu; pues trahá nan instrumèntnan ku kosnan simpel den Atelier Omar
Sling uzando for di weanan bieu, pòchi di konsomé te na pia di fèn… kaba sali i pone un bon
ambiente unda ku nan yega.
Mayoria di e integrantenan aktual den VivaKids Recycleband ta nobo, pues pa hopi di nan e
produkshon di e kansion “Instrumènt” tabata un eksperiensia kompletamente nobo. Huntu ku e
direktor di VivaKids Recycleband i alabes artista multitalentoso, Omar Sling, e muchanan a
kompositá e kansion, drenta studionan di grabashon i pasa dor di un dia largu pa a logra
produsí e videoclip akí. Eksperensianan manera esaki, ta simianan den bida di e muchanan akí
ku Omar ta spera ku lo sigui duna fruta den futuro trayektoria di kada mucha ku forma parti di
Vivakids.
Pues awor, aparte di por pidi “Instrumènt” na bo emisora preferí, bo mes por busk’é riba
Youtube di VivaKids Recycleband tambe i “blaas e” riba bo televishon, tèblet òf telefon kuantu
biaha ku bo ke.