KÒRSOU I TRINIDAD & TOBAGO A START KU NEGOSIASHON PA UN AKUERDO KOMERSIAL DI ALKANSE PARSIAL

Willemstad – Despues di dos aña ku Minister Cijntje i Minister Gopee-Scoon a firma e akuerdo general, e timnan negoshadó di Kòrsou i Trinidad & Tobago a finalisá dos dia intenso di negosiashon na Renaissance siman ku a pasa. Tantu Minister di Desaroyo Ekonómiko di Kòrsou Honorabel Ruisandro Cijntje komo e Minister di Komersio i Industria di Trinidad & Tobago Honorabel Paula Gopee-Scoon a enfatisá ku nan ke pa finalisá e negosiashonan di e akuerdo promé ku fin di 2024.

E timnan ta konsistí di ambtenaarnan di varios ministerio di ambos pais. E Negosiadó prinsipal pa Kòrsou ta Sr. Caryl Monte, eksperto den e materia di Komersio Internashonal i Presidente di e Komishon permanente pa Komersio i Relashonan Internashonal di Kòrsou i pa Trinidad & Tobago ta Sr. Randall Karim  Sekretario General di e Ministerio di Komersio i Industria di Trinidad & Tobago.

Pa Kòrsou krese su ekonomía i diversifiká for di Turismo, e mester eksportá mas i atraé mas invershon ekstranhero den diferente otro sektor. Un akuerdo komersial ta duna akseso na merkado pa produkto i servisio i ta stimulá koperashon i invershon. Kòrsou su strategia nashonal di eksportashon ta enfoká riba integrá komersialmente pa medio di akuerdonan komersial i  miembresia na World Trade Organization i mehorá kompetividat di nos sektornan i empresarionan pa nan por hasi mas negoshi pafó di Kòrsou, subi empleo i inverti mas. E akuerdo ku ta negoshando ku Trinidad & Tobago ta brinda e akseso na nos pa e merkado di Trinidad & Tobago i di Trinidad & Tobago pa nos. E ta di alkanse parsial  pues pa un sierto kantidat di produkto i servisio. Trinidad & Tobago ta miembro di Caricom. Esei ta brinda oportunidat na nos empresarionan pa inverti i krea kadena di balor pa abastesé e merkado di Caricom. Kòrsou ta den e proseso pa bira Miembro Asosiá di Caricom. Miembro Asosiá no ta duna nos e akseso na Merkado, pero e akuerdo komersial si, i asina tiki tiki nos ta amplia nos merkado i asina nos empresanan por krese nan kapasidat i plama nan riesgo. “Nos region tin hopi oportunidat i nos mester stop di kompeti ku otro den Karibe, pero mas bien uni forsa i trese invershonan kolektivo grandi ku ta benefisiá nos tur” Minister Cijntje a indiká na e timnan negoshadó den un enkuentro durante kwa ela presentá nos planan pa desaroyo ekonómiko.

Dia 28 di yüli próksimo Minister Presidènt lo firma e tratado pa bira miembro asosiá di Caricom. Miembresia Asosiá den Caricom ta un stap grandi den nos integrashon  i ta duna nos hopi oportunidat pa kolaborá, kapasitashon, koperá i konosé otro mas mihó. Trinidad & Tobago ta bira e promé pais den Caricom ku nos ta bai profundisá mas kune. Na Oktober próksimo, Minister Cijntje lo firma e Akuerdo General ku Suriname pa duna inisio di e negosiashonan pa un akuerdo komersial di alkanse parsial ku Suriname tambe, ku ta tambe miembro di Caricom. Minister Cijntje ta sigui move su agènda komersial internashonal pa sigui oumentá oportunidatnan pa empresarionan di Kòrsou den nos region. Hopi kos grandi na kaminda.

---