Ta inisiá ku mudansa Plasa di Arte i restrukturashon Awasá

WILLEMSTAD – Den kuadro di e desaroyonan rònt di Plasa di Arte i restrukturashon di Awasá, Minister Ruisandro Cijntje di Desaroyo Ekonómiko ta anunsiá ku ta bai inisiá e proseso di mudansa for di Awasá, konforme e maneho di ‘standplaats’ pa sentro di siudat “Standplaatsenbeleid Binnenstad (ougùstùs 2022)”. Ta trata di e mudansa pa marshe “Plasa di Arte” situá na Renaissance Park. Segun e maneho akí, Awasá ta keda un área destiná únikamente pa artistanan. Despues di e mudansa lo sigui desaroyá e área di Awasa huntu ku Ministerio di Tráfiko, Transporte i Planifikashon Urbano (VVRP).

Ministerio di Desaroyo Ekonómiko ta enfatisá ku ta di sumo importansia pa tur kos ta na òrdu, pa por kuminsá hasi entrega di e pèrmitnan di ‘standplaats’. E entrega di pèrmitnan di ‘standplaats’ lo bai tuma lugá durante un evento na e lokalidat na Renaissance Park. Tur empresario ku ta pará aktualmente na Awasá (ku eksepshon di 4 empresario ku tin un kupo di artista) mester muda pa Plasa di Arte pa mas tardá 1 ougùstùs 2024. Adishonalmente, kada empresario lo risibí un cover pa nan stènt i lo mester hasi palabrashon pa ku uso di esaki ku Fundashon Marshe kual ta e entidat ku ta manehá e área aki pa gobièrnu.

E kondishonnan esensial ku kada empresario mester kumpli kuné pa tur kos ta na òrdu na tantu Plasa di Arte komo na Awasá ta lo siguiente:

• Ta rekerí pa tur stènt na Plasa di Arte ta limpi sin material adishonal ku ta kubri esaki. Ta referí na e echo ku no ta aseptabel pa pone por èhèmpel palu òf tapol na e stèntnan ku por tapa e bista di e stènt. Si akaso mester pone algu èkstra, esaki mester ta algu uniforme i mester hasi esaki den konsulta ku Fundashon Marshe, pues kada empresario no por usa nan propio material.
• Tur empresario ku ta stashoná na Plasa di Arte mester a hasi petishon pa por ta outorisá pa para na e lokashon via di Fundashon Marshe pa mas tardá 1 ougùstùs 2024.
• Tur empresario mester ta stashoná pa mas tardá 1 ougùstùs 2024 na nan stènt na Plasa di Arte konforme e number di stènt ku el a haña, kual ta e number ku lo bini tambe riba nan pèrmit.
• Tur stènt ku ta na Awasá (ku eksepshon di e 4 kuponan di artista) mester wòrdu kitá pa mas tardá 31 yüli 2024.
• E empresario ku no muda pa Plasa di Arte NO tin e opshon di keda pará na Awasá i lo pèrdè su stènt na Plasa di Arte.
• Konsiderando ku Awasá ta un área destiná únikamente pa artista, e 4 artistanan ku ta keda stashoná na Awasá nan stèntnan mester kumpli ku e midínan konforme e “Standplaatsenbeleid Binnenstad” i no ta outorisá di ta mas grandi ku esaki. Pa mas tardá 1 sèptèmber 2024 mester a hasi e adaptashonnan nesesario na e stèntnan ku no ta kumpliendo ku e maneho.

Minister Cijntje ta sumamente kontentu di mira kon e plannan pa ku Plasa di Arte i Awasá ta kristalisando, despues di e inougurashon di Plasa di Arte ku a tuma lugá na òktober aña pasá. Un di e metanan prinsipal di e plasa aki ta pa sigui fasilitá nos empresarionan den nan desaroyo i kresementu. Esaki ta kuadra ku e maneho di Minister Cijntje ku ta enfoká pa sigui enkurashá desaroyonan ku lo faboresé i stimulá nos pais den kresementu ekonomikó.