Torneo pa kalentá di sòftbòl “Fastpich” femenino den siman Olímpiko.

Torneo pa kalentá di sòftbòl “Fastpich” femenino den siman Olímpiko.

Djaweps awor, 8 di ougùstùs 2024, CSB ta start ku su promé aktividatnan deportivo pa aña 2024. Den kuadro di siman olímpiko CSB ta organisá un torneo pa kalentá promé ku kampionato nashonal ranka sali.

E torneo aki ta start djaweps awor i lo tin wega djaweps, djabièrnè, djasabra pa 8’or di anochi, miéntras ku e gran final ta djadumingu 3’or di atardi. E promé partido ta bai entre e kampion i e sup kampion di e kampionato nashonal 2023: Pichingolo Nissan/KIA vs. Sta. Rosa Angels Vanddis.

Weganan ta tuma lugá na Sam Bunting Ballpark ku eksepshon di e wega di djasabra, ku ta na Buena Vista Ballpark bou di e lusnan nobo nobo.

Djadumingu lo ta un dia spesial ya ku aparte di e gran final, lo tin un antesala di e futuro sòftbolistanan di Kòrsou den e kategoria U-15 (hubenil), ora ku e ekipo S.B.T. Fenix enfrentá e ekipo Souax S.B.T. den un wega amistoso.

Nos ta invitá tur fanátiko pa bin apoyá nan ekipo faborito i alabes ta testigu di kiko por spera den e kampionato nashonal di Sòftbòl di Kòrsou 2024.