Minister Javier Silvania: ENTRADA DI IMPUESTO I PRIMANAN SOSIAL TA KEDA KIBRA REKÒR

ENTRADA DI IMPUESTO I PRIMANAN SOSIAL TA KEDA KIBRA REKÒR

Servisio di impuesto a raportá e entrada di impuesto i primanan sosial pa luna di yüli. E entrada konhunto na luna di yüli ta mas ku 19 mion florin mas haltu ku loke a presupuestá. E suma aki ta konsistí di 4.2 mion florin di entrada di impuesto i no ménos ku 15 mion florin na entrada di primanan sosial mas haltu ku loke a presupuestá. Si nos konsiderá e entrada di henter aña 2024, ta kasi difísil pa asimilá kon positivo e desaroyo di entrada ta. E entrada di impuesto ta 849,9 mion florin, esta 2% mas haltu ku presupuestá i ta keda 7,2% riba e promé 7 lunanan di 2023. E entrada pa primanan sosial di e promé 7 lunanan ta 542,3 mion i, pues, ta 9,1% mas haltu ku e presupuesto i ta nada ménos ku 12,4% mas haltu ku e mesun periodo di 2023. E OB riba importashon rekoudá pa duana ta un suma 96,2 mion florin den e promé 7 lunanan, kompará ku 84,6 mion florin na 2023, un oumento di 13,7%.

For di mei di 2021, entrada a kuminsá oumentá i esaki a kontinuá te ku awor. Naturalmente, esaki no ta sosodé riba su mes. Den e konteksto aki, servisio di impuesto ta invitá tur hende pa tuma nota di e rapòrt di maneho di e promé mitar di aña, ku ta disponibel via www.belastingdienst.cw bou di ‘Tokante nos’. E ta kontené hopi informashon tokante tur e proyektonan ku ta tumando lugá aktualmente na servisio di impuesto pa asina oumentá entrada i mehorá servisio na kliente.

For di momentu ku Minister di Finansa, Javier Silvania, a asumí su funshon na 2021, el a komprometé su mes kompletamente pa oumentá e kumplimentu ku impuesto. Debí na e trabounan relashoná kumplimentu ku servisio di impuesto, SBAB i duana a bin ta ehersé, a logra resultadonan impreshonante den e último añanan. E entrada adishonal aki ta kontribuí entre otro na asfaltamentu di kareteranan, institutonan di kuido ta risibí supsidio adishonal pa hasi invershonnan nesesario i ámtenarnan ta risibí porfin indeksashonnan atrasá i retrasonan salarial. Un bon ehèmpel di e resultadonan di e esfuersonan di kumplimentu huntu, ta e kantidat di empresarionan ku ta paga e impuesto riba benta (OB) ku nan ta retené tur luna. E kantidat aki a oumentá di 4.100 na mei di 2021 pa mas ku 6.000 na 2024. Un oumento di kasi 50%. I e kantidat aki ta sigui oumentá kada luna. Servisio di impuesto ta konsiente ku ainda tin kontribuyentenan ku no ta paga e parti ku ta toka na nan.

Naturalmente, no ta posibel pa solushoná tur e problemanan di e último dékadanan den un par di aña. Di tur manera, e tendensia ta kla, i servisio di impuesto sigur tin intenshon di sigui ku e maneho aktual den koperashon ku su partnernan i ku sosten di Minister.