LIDER DI PARTIDO MEP A MANDA UN CONTESTA POR ESCRITO TAMBE
Partido MEP:
Partido MEP:
Despues di e peticion por escrito di Partido RAIZ,
LIDER DI PARTIDO MEP A MANDA UN CONTESTA POR ESCRITO TAMBE
No tawata tin e necesidad di warda riba un yamada
Partido MEP a tuma nota cu Lider di Partido Raiz a declara cu el a keda warda yamada di Lider di MEP pa un decision y contesta riba un peticion di Partido RAIZ den nan carta manda diadomingo 8 september, 2024. Esaki tawata un peticion por escrito di Partido RAIZ, den cual nan a pidi pa haya un contesta prome cu 9’or di dialuna mainta. Por lo tanto Lider di Partido MEP Evelyn Wever-Croes a manda un contesta dialuna 8’or di mainta, por escrito tambe, na Partido RAIZ, na unda cu a indica cu Partido MEP no lo cambia di opinion pero si ta sostene candidato di RAIZ como vicepresidente di Parlamento.
For di siman pasa diahuebs, sin por a substancia nan motibo, RAIZ a pidi MEP pa baha Presidente di Parlamento Edgard Vrolijk y pone un otro candidato di MEP pasobra RAIZ no tin confiansa den imparcialidad di señor Vrolijk. Esaki pa Partido MEP no tawata acceptabel pasobra RAIZ no por dicta den MEP y por lo tanto MEP a informa RAIZ cu no lo cambia candidato manera RAIZ a pidi. Ademas, tin un acuerdo fundamental entre MEP y RAIZ, riba cual e coalicion di MEP y RAIZ ta basa, ta encera cu MEP ta apunta un presidente di Parlamento, y RAIZ ta apunta vicepresidente di Parlamento. Tambe cu MEP ta apunta su ministernan y RAIZ ta apunta su ministernan. Tambe despues a palabra cu MEP ta apunta GevMin na Den Haag y RAIZ ta apunta GevMin na Washington.
Partido MEP ta lamenta cu RAIZ a kibra e acuerdo aki a bay cera aliansa cu AVP, Marisol y Gerlien dialuna mainta pa baha nos presidente Edgard Vrolijk y pone Kamperveen. E voto di complot hunto cu AVP a kibra e acuerdo y sin acuerdo no tin coalicion.
E acuerdo entre MEP y RAIZ no ta cu ta RAIZ ta dicidi ken MEP ta apunta como presidente di Parlamento. A base di e hecho cu pa capricho di un miembro den RAIZ, nan ta kibra acuerdo, ta kibra tambe e confiansa cu Partido MEP tin den Partido RAIZ na e momento aki. Pasobra cu esaki nan ta mustra cu ora nan no gusta un persona, nan lo pidi pa bahe tambe, inclusive si ta prome Prome Minister.
Partido MEP lo sigui traha pa bienestar di nos pais, maske ta demisionario. Campaña a cuminsa pa eleccion dia 6 di december venidero. Y un biaha mas, MEP ta pidi sosten di cada ciudadano pa deposita nan confiansa den nos partido pa sigui goberna nos pais y sigui cu e maneho cu Gabinete Wever-Croes a bin ta hibando e ultimo 7 añanan cu, apesar di tur reto, a pone Aruba bek riba pia despues di e desaster financiero di Mike Eman y su gobierno y tambe despues di e pandemia.
Sr. Arends, sr. Matos,
A raiz di bo mail di 8 di september2024, den cual bo ta puntra den nomber di RAIZ pa MEP duna
boso otro nomber pa Presidente di Parlamento, mi ta informa bo como lo siguiente.
E acuerdo entre MEP y RAIZ, cual ta e acuerdo fundamental riba cual e coalicion di MEP y RAIZ ta
basa, ta encera cu MEP ta apunta un presidente di Parlamento, y RAIZ ta apunta vicepresidente di
Parlamento. Tambe cu MEP ta apunta su ministernan y RAIZ ta apunta su ministernan. Tambe
despues nos a palabra cu MEP ta apunta GevMin na Den Haag y RAIZ ta apunta GevMin na
Washington. Riba e ultimo aki, MEP a indica cu tin duda si e candidato cu RAIZ a propone ta e miho
candidato pa e funcion, pero RAIZ a persisti. Despues a candidato mes a retira su candidatura. Pues
desde 3 aña pasa, e palabracion ta cu MEP ta apunta e presidente, y no cu RAIZ ta determina ken di
MEP por bira presidente. Mescos cu MEP no por a dicidi pa RAIZ ken ta bira minister of vice
presidente pa RAIZ. E palabracion aki a wordo ehecuta sin ningun problema pa tres aña largo.
Pues e peticion di RAIZ, apenas diahuebs ultimo pa prome biaha verbalmente, y apenas un dia pasa
por escrito, a sorprende MEP. Mas aun mirando cu te na e momento aki RAIZ no por a substancia
kico ta e motibo di desconfiansa. Es mas, den reunion cu lider di partido RAIZ dia 8 di september
2024, e mes a indica di no ta na altura di esaki. Manera nos representante a menciona na sr. Matos den
e proceso di escalacion na diferente ocasion, partido MEP ta mantene su mes na e palabracion
fundamental desde inicio di e periodo parlamentario despues di eleccion 2021. Locual ta encera cu
partido MEP conforme palabracion ta postula e candidato pa Presidente di Parlamento y partido RAIZ
ta postula su candidato pa Vicepresidente di Parlamento, y MEP lo sigui respeta e acuerdo aki. Esaki
tabata e caso den e ultimo 3 añanan y lo ta igual pa e aña aki pa e periodo di Parlamento nos dilanti, al
menos cu RAIZ kier renegocia e acuerdo, pero esaki no a wordo pidi pa RAIZ.
Despues di consulta cu Conseho di Partido di MEP, consistiendo di directiva, candidatonan, y
presidentenan di districto, e posicion no a cambia pa locual ta e palabracion ariba menciona, y
Partido MEP ta para tras di e candidatura di e Presidente actual, Edgard Vrolijk. Sr. Vrolijk ta
e parlamentario cu a traha mas ley den nos Parlamento, entre otro tur e leynan di integridad, y ta esun
cu ta e motor tras di introduccion di Ombudsman, c uta den su fase final. Aparte di esey, a sa di
profesionalisa e aparato di Griffie der Staten, buscando e personal cualifica necesario, invirtiendo den
e infrastructura, y ta encarga cu e proyecto grandi di remodelacion di e edificio di Parlamento.
Pa loke ta trata e nombernan di candidatonan pa votacion, esaki ta forma parti di e proceso politico y
manera ta e caso tur inicio di aña parlamentario lo ser informa pa medio di e lider di fraccion di MEP
na e lider di fraccion di RAIZ y viceversa manera a bin ta sosode e ultimo añanan.
Gobernacion ta algo serio, y su continuacion tambe, manera mi a informa líder di RAIZ ayera. Pesey
mi ta lamenta cu RAIZ a duna declaracionnan den prensa, den cual publicamente a anuncia e
intencion di kibra e acuerdo entre MEP y RAIZ. Mi speransa ta cu di parti di partido RAIZ lo tin e
refleccion necesario na bienestar di pais Aruba, y pa cumpli cu e acuerdo entre MEP y RAIZ.
Atentamente
Evelyn Wever-Croes, Lider di Partido MEP
