Djarason dia 11 di sèptèmber Caresse Isings a presentá su último obra “Klaridat” pa un sala yen yen di hende ku tabata entusiasmá pa risibí i duna forsa na e artista su yamada pa mas amabilidat den nos komunidat.

September 13, 2024 REDAKSHON

Normalmente Caresse ta duna un show pa aña i esei el a hasi kaba na yanüari di e aña akí ku e presentashonnan di su obra “Supera” den aula di Universidat. Sinembargo, e echo ku riba dia 11 el a kumpli 60, tabata motibu spesial pa bolbe presentá un obra mas den 2024. Ku e último One Woman Show akí Caresse a invoká “É Forsa ku ta Kura” ku e intenshon pa inspirá tur hende riba nos isla pa bolbe kuminsá trata otro ku mas kariño i amabilidat. Caresse ta ripará ku e trato amabel ku semper a tipifiká nos kultura ta bayendo pèrdí. Tambe e ta nota ku gobièrnu no ta produsí programanan den multimedia manera ántes tabata nos kustumber, pa empoderá nos hendenan. I e ta konvensí ku entidatnan sosial i komersial mes por bini huntu pa organisá i ehekutá proyektonan di “Nation Building” i seshonnan di etikèt ku por edifiká, inspirá i motivá kada persona riba nos lugá. E artista ta deseá pa Kòrsou keda desaroyá un komunikashon sano i agradabel. Pesey mes ta konsiderá ku ta bon pa empresarionan realisá ku kultura di nan organisashon ta parti importante di loke ta sigui forma kultura di henter nos pais i komportashon di nos hendenan. Caresse ta organisá seshonnan interaktivo di etikèt pa yuda organisashonnan generá un bon ambiente di un forma kreativo. I ku su sinku diferente personahenan ku a aparesé den e obra Klaridat el a toka e temanan mas obvio den komportashon ku tin mas tantu influensia riba nos esfera komún. E Ingles Karibeño a toka e echo ku hende gusta keha na lugá di buska solushon. E skèch di e Latina transgénero Susanita a trese dilanti ku bo manera di komuniká ta sea atraé òf kore ku hende. Asina kada unu di e personahenan tabatin nan mes un mensahe kolorido ku di forma humorístiko a entretené i inspirá públiko presente. E obra tabata hopi interaktivo. Henter anochi Caresse a kana pasa den hende, hunga wega ku nan i partisipantenan a gana premionan bunita. Komo eskultor ambiental Caresse ta traha obranan di arte di koral realístiko for di material resiklá i retratonan di e evento Klaridat ta ilustrá kon e ganadónan a keda enkantá ku nan premio. E músikonan Ernesto Paz, Roselin Bey, Tio Ali i Ericoson a kompañá Caresse na momentu ku el a sakudí henter e sala ku un tambú “Mama bo sa” pa kaba di kore ku tur mal energia. Caresse ta enfatisá ku: “Kultura ta hopi mas ku djis keda rekordá Tula, i nos tur ke p’e por bira kara numa’wo i mira kon nos ta biba ku otro.” Na final di e One Woman Show tur hende a kompartí ku ratu ameno huntu na mesa, disfrutando di e delisioso buffet di La Hacienda Olivia. Caresse ta gradisí e tim di La Hacienda Olivia pa nan dedikashon ku a yuda bisti e anochi na magia puru. Tambe e ta gradisí públiko pa nan konfiansa den su kapasidat pa karisá nan sintí durante di su obra i henter su tim di produkshon pa nan aporte inkansabel. Den su mes palabranan: “E kos por wèl di yama One Woman Show, ma ta pasó esun “woman” akí ta haña e aporte inkansabel ku sémper mi tim ta brindami, ku nos por selebrá e éksito ku e biaha aki un biaha mas nos a logra kosechá!”