Promé Minister Pisas a resolvé e impase entre Aqualectra i Global Oil éksitosamente

Willemstad – Na luna di yüni 2023, Refineria di Kòrsou (RdK) a sera un akuerdo di hür ku Global Oil Management Group (Global Oil) kaminda a otorgá Global Oil e derechonan pa operá, entre otro, e unidatnan GT9 i GT10 pa produkshon di e koriente ku Global Oil mester pa su mes produkshon di asfalt na Emmastad. Dor ku e dos unidatnan ei (GT 9 i GT 10) ta produsí mas tantu koriente ku Global Oil mester pa su aktividatnan di produkshon di asfalt, Aqualectra i Global Oil mester a negoshá e término nan pa suministro di èkstra kapasidat na Aqualectra den temporada ku esaki ta nesesario pa satisfasé e demanda di koriente na Kòrsou tur momentu di dia. Lamentablemente na final di yüli e negosiashonnan aki a kai den un impase ku posibel konsekuensianan negativo pa usuarionan lokal di koriente si e situashon aki no a keda resolvé debidamente y na tempu. Na e okashon aki, RdK i Aqualectra a pone gobièrnu na altura di e situashon i inmediatamente Promé Minister Pisas, komo e minister responsabel pa RdK,  a tuma kontakto ku Global Oil i a indiká na dje ku Gobièrnu a pidi e outoridat ku ta supervisá merkado di energia aki na Kòrsou (RAC: Regulatory Authority Curaçao) pa investigá e situashon ku ta reinando y entrega su rekomendashonnan mas pronto posibel.

Konsekuentemente dia promé di ougùstùs último, Promé Minister Pisas a pidi Global Oil pa posponé tur akshon ku nan ta konsiderando di tuma te ku promé di sèptèmber próksimo, pa evitá kualke peliger pa e produkshon i suministro di koriente riba nos isla. Promé Minister Pisas a splika na e momentu ei ku e ta spera ku e desishonnan nesesario lo wòrdu tuma dentro di un luna di tempu. Global Oil a bai di akuerdo ku e petishon pa warda riba e rekomendashonnan di RAC. E rekomendashonnan di RAC tokante e problemátika entre Aqualectra i Global Oil pa suministro di koriente temporalmente durante e periodo di aña ku demanda ta haltu a keda kla dia 5 di ougùstùs último. Seguidamente dia 7 di ougùstùs Promé Minister Pisas i Minister pa desaroyo ekonómiko a informá tantu Aqualectra komo Global Oil ku nan tin ku sigui negoshá ku otro te ku fin di ougùstùs ku asistensia di un komishon di guia, ku a konsistí di Caryl Monte pa Gobièrnu i Patrick Newton di parti di RdK. Dia 11 di sèptèmber último e Komishon di Guia a informá Promé Minister Pisas i Minister di Desaroyo Ekonómiko, sr. Charles Cooper, ku e negosiashonnan a ser konkluí éksitosamente i awe mainta Aqualectra i Global Oil a firma un akuerdo riba e suministro temporal di koriente na Aqualectra te ku final di 2024. A kombení tambe ku e dos partidonan lo sigui negoshá ku otro te, mas tardá, final di 2024 riba un akuerdo nobo pa kompra di koriente (“Power Purchase Agreement”) dor di Aqualectra serka Global Oil pa e añanan 2025 i despues. Asin’aki Promé Minister Pisas a logra resolvé e impase ku a surgi entre Aqualectra i Global Oil i trese e trankilidat bek den nos komunidat na  interes di e usuarionan di koriente na, i e ekonomia di, Kòrsou.

Gobièrnu ta felisitá tantu Aqualectra komo Global Oil pa tur e esfuersonan hasi durante e último simannan pa yega na un akuerdo sólido pa suministro di koriente durante e periodo ku Aqualectra mester di èkstra kapasidat pa sirbi hinter e komunidat di Kòrsou.

Akuerdo Aqualectra i Global Oil

Akuerdo firmá |sèptèmber 2024