Gabinete Pisas II semper a respetá sindikato i plataforma CGOA, i no a lanta for di mesa di negosiashon.

Gabinete Pisas II semper a respetá sindikato i plataforma CGOA, i no a lanta for di mesa di negosiashon.

WILLEMSTAD – Durante ultimo dianan ku a transkurí, Gabinete Pisas II a tuma nota di gritu di sindikatonan i hasta petishon di sindikatonan pa por reuní bou di ora di trabou ku nan miembronan. Lamentablemente durante di reunion di djaweps ultimo, den plataforma di CGOA, Gobièrnu di Kòrsou a splika sindikatonan e problemátika ku a surgi for di 2020, i ku Gobièrnu tin ku kumpli ku leinan i loke tin ankrá den lei anteriormente. Gabinete Pisas II durante di e plataforma di CGOA, den kual e la indiká na tur representante di sindikatonan presente, ku e ta dispuesto na risibí posibel senarionan serka sindikatonan i ku te hasta su persona lo por bai te 12or di anochi mes si esaki ta nesesario, pa solushoná e impase ku tin. Lamentablemente tabata un sorpresa ku no opstante ku e Minister a duna e sindikatonan den CGOA e oportunidat pa reuní te ku 12or di anochi, ku e sindikatonan a lanta for di mesa, sin papia nada i a bandoná e sala di reunion.

Den e kuadro aki, e yamada di e Gabinete Pisas II ta, ku ta na mesa nos ta solushoná e impase. Si Gabinete Pisas II a duna e posibilidat pa sinta den plataforma CGOA te 12or di anochi, pa asina sindikatonan tambe hasi uso di nan oportunidat i splika nan puntonan di preokupashon, ta di lamentá ku nan no a hasi uso di e oportunidat aki for di djaweps ultimo. Gabinete Pisas II  un bes mas ta enfatisá, ku e ta rekonosé outonomia sindikal di kada sindikato i tambe kada sindikato ku kier aktua di e manera ku nan ta deseá. Pero, Gobièrnu di Kòrsou ta enfatisá, ku nos mester mantené kalmu i kabes friu, i ku ta na mesa, nos ta yega na tur solushon pa e empleado públiko.  Gabinete Pisas II ta bolbe hasi un yamada na tur sindikatonan pa ban dialoga ban bèk na mesa den CGOA pa por yega na posibel solushon.