“Chandlers Learning Center” selebrando 5 aniversario
“Chandlers Learning Center” selebrando 5 aniversario
Dia 6 di òktober próksimo, Chandlers Learning Center , bou di direkshon di Gedion Chandler, lo tin un “graduation concert” relashoná ku entrega di sertifikado i selebrashon di 5 aña di eksistensia.
Despues ku Maestro Gedion Chandler, durante 12 aña a duna formashon musikal den e proyekto di Instituto pa Formashon musikal na hóbennan den bario di Kòrsou, i despues dirigí i instruí hóbennan ku a forma parti d Junior All Star Orchestra, na 2019 ela inisiá ku su propio proyekto di su propio skol di muzik.
Ku su eksperensia komo dosente prinsipal riba tereno di formashon musikal, ela krea su mes proyekto, pa duna lès di piano na hóben i adulto.
E konsierto di djadumingu 6 di òktober a bai bira hopi interesante.
E promé parti lo hasi entrega di sertifikado i presentashon di e studiantenan di Chandlers Learning School, i despues, lo tin pa promé biaha despues di kasi 8 aña, un presentashon di Junior All Star orchestra den su forma outéntiko.
E konsierto aki lo ser graba tantu oudio komo video, pa dokumentashon.
Di e forma aki Gedion lo ke mustra studiantenan, mayornan, i pueblo en general, ku seriedat, kapasidat i determinashon bo por logra yega hopi leu riba tereno musikal.
E konsierto lo tuma lugá , djadumingu 6 di òktober , di 17.00 pa 20.00 na Summer Venue na Ronde KLip. ( e hanchi na otro banda di kaya di misa di Bonam, drenta bai paden).
Bin disfrutá di e presentashon di e alumnonan di Chandlers learning center, i e presentashon di Junior All Star di su formashon outéntiko.
E karchinan ta na balor di ang.25,- i ta optenibel serka studiantenan i na telefòn, 5165255.
Gedion Chandler
Direktor di Chandlers Learning School
