Abogado Karyl Bertrand a representa Korsou bon den Konferensia di Interpol

WILLEMSTAD—Entre 23 pa 25 di sèptèmber Kòrsou tabata anfitrion dje konferensia kontra krímen di propiedat intelektual organisá pa Interpol ku sosten di Gobièrnu di Kòrsou i Curinde. Tabatin alrededor di 375 partisipante prosedente di 65 pais ku a partisipá na e konferensia. Dje 65 pais komo 40%  ta esnan ku ta laborá den e sektor hudisial ku ta atendé ku infrakshonnan kometé. Aña pasa e konferensia aki a keda organisá na Noruega. E edishon dje aña aki ta e promé ku a keda organisá den Karibe i komo tal Kòrsou ta marka historia.  Otro aña e ta tuma lugá na Lyon (Fransia). Algun dje topgunnan di mundu pa lokual ta trata esnan ku ta dominá e materia di propiedat intelektual tabata presente p’e konferensia aki. Un di esnan ku ta dominá e materia aki na nivel global ta abogado Karyl Bertrand. E tabata un dje oradornan invitá ku a trata e tema di  Deploying Cross-Sector Solutions for Seized Goods, kua ta nifiká uso di solushonnan entre sektornan pa ku produktonan falsifiká. Den su presentashon el a enfoká riba importansia di kolaborashon entre representantenan di diferente sektor di un pais, tantu públiko (p.e. duana, polis, salubridat, zona franca, ekonómiko) komo sektor priva i diálogonan den region ku ta konta ku partisipashon di profeshonalnan di propiedat intelektual di Karibe. Su presentashon a kousa un impakto hopi positivo kua por keda dedusí for di e diferente reakshonnan ku e la risibí di entre otro representantenan di KPC, Duana i tambe MEO. Tambe e la sabi na risibí hopi kòmplimènt di parti dje ekspertonan ku a bini Kòrsou pa partisipá den e konferensia.  E la foma parti di un pènel di ekspertonan riba e tereno. E la hasi esaki ku Virginia Cervieri di Uruguay kende ta un eminensia pa loke ta abogasia den Sur Amérika. Nan ta un dje famianan ku mas kantor di abogado den diferente pais den Sur Amérika. Tambe a forma parti dje pènel Gary Robinson kende ta hefe di Unidat Finansiero di Polis na siudat di London na Inglatera. E Unidat Finansiero ta aktivo den hinter Reino Uni i ta konsistí di e unidatnan di krímen kontra di propiedat intelektual, krímen ku tarheta i pago, i persekushon di froude di seguro. Nan 3 a partisipá huntu den un dje pènelnan ku a hala mas akohida.  Ta asina ku despues di su presentashon, e la keda aserka pa yuda nan organisá e diálogo aki na na Puerto Rico. Ta bon pa suprayá ku abogado Karyl Bertrand a risibí invitashon pa por tabata orador pa International Trademark Association (INTA) na un konferensia ku a tuma lugá 23 di sèptèmber na estado di Filadelfia na Merka, pero a opta pa representá Kòrsou den e konferensia organisá pa Interpol. Lokual ku a hala atenshon di su presentashon t’e manera práktiko kon por apliká varios lei lokal den strategianan pa kombatí krímennan kometé kontra propiedat intelektual. P’e tabata masha importante representá Kòrsou dignamente den e konferensia aki.