Proyekto florin karibense avansando riba un bon ritmo A bati e promé monedanan di Cg1 i Cg5

WILLEMSTAD/PHILIPSBURG – Bandera di Kòrsou i di Sint Maarten tin un siman kaba ta bula
riba tereno di Royal Canadian Mint (RCM) na Winnipeg, Canada. Hisamentu di e dos
banderanan a marka klousura simbóliko di un bishita spesial na RCM kaminda, mas tempran
riba e dia ei, a bati e promé monedanan di 1 i 5 florin karibense. Di e manera akí, CBCS a yega
un paso mas serka di introdukshon di florin karibense.
Cg1 i Cg5 ta e dos último monedanan di e serie di florin karibense ku ta ser produsí; produkshon
di e denominashonnan mas chikitu a tuma lugá kaba. Segun ku e monedanan tabata lora sali for
di e imprenta, Alex Reeves, Senior Manager di Public Affairs na RCM, a splika CTV News, un kanal
di televishon kanades ku tabata presente na e okashon, ku esaki ta un momento spesial pa RCM i
pa mas ku un motibu, ya ku ta trata aki di e promé monedanan ‘trimetáliko’ ku nan ta produsí. E
monedanan akí ta konsistí di tres diferente metal i, komo tal, ta un inovashon teknológiko pa RCM.
Tradishonalmente, ora un pais laga RCM produsí su monedanan, RCM ta duna bandera di e pais
en kuestion un lugá permanente riba e kaminda ku ta hiba na entrada di nan fasilidat di produkshon
na Winnipeg. Na e okashon akí, ta bandera di no unu sino dos pais a bini aserka, ya ku e monedanan
lo ser usá tantu na Kòrsou komo na Sint Maarten. Himno nashonal di ámbos pais a zona durante
e seremonia di hisa bandera.
Na momento di bati e promé monedanan i na e seremonia ku a sigui, CBCS tabata representá pa
Ahmed Bell i Jason Rogers, komo miembronan di su Hunta di Supervishon, Direktor Ehekutivo
Leila Matroos-Lasten i dos miembro di e tim di XCG: Alvin Francisco i Eleanore Reynaert-Vervuurt.
Representando Pais Sint Maarten, Minister di Finansas Marinka Gumbs i su Hefe di Gabinete, Nicole
Marlin, a hasi akto di presensia. RCM tabata representá pa su presidente/CEO Marie Lemay i otro
funshonario.
Den un diskurso breve, Sra. Matroos-Lasten a menshoná ku e produkto di kalidat haltu ku a keda
realisá ta danki entre otro na RCM su ekspertisio. “RCM a demostrá di ta e partner stratégiko ku
nos tabata buska. Danki na un kolaborashon profeshonal na nivel, e diseño nobo di e monedanan
a gana aseptashon total bou di e siudadanonan di Kòrsou i Sint Maarten i nos ta spera di por
kontinuá e kolaborashon akí den e añanan benidero.”
Segun plan, CBCS lo risibí tur moneda di Cg den e último kuartal di e aña akí.
Willemstad, 27 di sèptèmber 2024
CENTRALE BANK VAN CURACAO EN SINT MAARTEN