KIKO TA PASANDO

E uniko kaminda ku bo ta haña tur informashon kompletamente gratis. Klik anto lesa. Manda tur loke bo ke pa wordu publika i invitashon pa kubri rueda di prensa na e Email: kikotapasando@outlook.com

NOTISIA POLISIAL

Kuerpo di Brantwer Kòrsou ta risibí 4 vehíkulo nobo

WILLEMSTAD – Djabièrnè ultimo, 27 di Sèptèmber, Minister di Hustisia, mr. Shalten Hato, di forma
ofisial a hasi entrega di 4 vehíkulo nobo na Kuerpo di Brantwer Kòrsou. Ta trata di respektivamente 2
pikòp Hilux, ku lo ser usa den trabounan diario di e kuerpo, 1 Toyota 4-Runner kual lo bai ser usa pa e
Ofisial na warda, I lo tei na insidentenan na unda ta rekerí presensia di e ofisial di turno I un Bus,
marka Coaster di Crown Automotives, ku lo ser usa pa e diferente klasnan di opleiding ku e kuerpo
tin, pero tambe na momentu ku bomberonan mester partisipá na diferente kurso òf entrenamentu
komo grupo. Kuerpo di Brantwer Kòrsou tabata konosé un bus kaba den pasado, pero ku tabata
akapará solamente 11 pasahero. Mirando e kresementu di e kuerpo, na unda tin e nesesidat pa
rekluta bomberonan nobo, tabata nesesario pa a hasi kompra di un bus permanente, ku ta duna
fasilidat pa por kumpli ku e tareanan represivo di forma mas optimal.
Durante di e seremonia ofisial, Minister di Hustisia, a hasi uso di e okashon tambe, pa huntu ku
representante di direktiva di ABVO, sr. Gregory Wilson, entrega di forma ofisial e dekreto na algun di
e personalnan ku ya pa un tempu ta fungi komo komandante di warda, pero no tabata tin nada regla
pa nan den e struktura. Minister di Hustisia a indiká tambe ku resientemente e vakatura pa solisitut
pa komandante di warda a keda publiká di forma interno den e organisashon, I ku e ta spera pronto
di lo por ofisialisá esaki ku 8 persona nobo den e funshon komo komandante di warda. E mesun
atardi aki, Minister di Hustisia, mr. Shalten Hato a duna rekonosimentu tambe den forma di un
gratifikashon na e personal ku a kumpli ku e trabou ekstraordinario na momentu ku nan a hasi
reskate na Shete Boka di dos persona ku a kai na awa. Kada personal di Brantwer ku a forma parti di
ámbos reskate, a risibí na nòmber di Gobièrnu di Kòrsou, un sertifikado ofisial di gradisimentu pa e
bon trabou, den kual nan a riska nan bida pa kumpli ku esaki I tambe nan dekreto ofisial di e
gratifikashon ku próksimamente nan lo risibí. Minister di Hustisia, mr. Shalten Hato ta sumamente
kontentu ku porfin e kuerpo di Brantwer Kòrsou a kuminsá risibí materialnan nesesario pa por
efektuá nan trabou diario di forma mas efisiente, I a indiká ku Gobièrnu di Kòrsou lo sigui invertí den
e proseso pa drecha e kuerpo di bombero I hasi esaki mas moderno den nan trabounan pa prevení,
prepará I sirbi nos komunidat.

 

639114718427035"
639114718427035"