Pa redusí peso atministrativo i e tempu pa optené pèrmit CBCS ta reformá Deviezenregulering
WILLEMSTAD/PHILIPSBURG — Dia 1 di òktober 2024, Centrale Bank van Curaçao en Sint
Maarten (CBCS) lo introdusí un regulashon di divisa nobo ku ta redusí tantu e peso
atministrativo komo e tempu nesesario pa optené pèrmit di divisa. ‘Segun kalkulashon di CBCS,
e reformanan lo hiba na un redukshon di aproksimadamente 50% den e kantidat di pèrmit ku
mester otorgá pa aña, sin ku esei stroba maneho efektivo di e reservanan di divisa’, segun
direktor ehekutivo, dr. José Jardim.
Deviezenregulering (Regulashon di divisa) ta regla implementashon di Regeling Deviezenverkeer
Curaçao en Sint Maarten den práktika. Entre otro, e regulashon akí ta kontené instrukshon pa e
bankonan di divisa riba tereno di kambio di divisa, un lista di e tiponan di transakshon di kapital ku
mester pidi pèrmit p’e, anunsio tokante pèrmit general i dispensashon, i regla i instrukshon tokante
kon e bankonan di divisa mester raportá transakshon di divisa na CBCS.
E reformanan prinsipal ta lo siguiente:
• a hisa e límite di transakshon ku mester pidi un pèrmit p’e, di NAf 150.000 pa NAf 500.000;
• a eliminá e pèrmit ku un persona natural tabatin mester pa e por transferí mas ku NAf 250.000
pa aña pa un kuenta bankario di dje den eksterior (i na su lugá, a introdusí un eksigensia di
pèrmit pa transferensia di NAf 500.000 òf mas);
• a eliminá e pèrmit ku e bankonan di divisa tabatin mester pa por duna un persona no residente
un fiansa na florin;
• a eliminá e pèrmit ku e bankonan di divisa tabatin mester pa por permití un persona no
residente tin fondo riba un kuenta, na florin, di mas ku NAf 250.000 (i na su lugá, a introdusí
un eksigensia di pèrmit pa transferensia pa eksterior di NAf 500.000 òf mas); i
• a introdusí un pèrmit general pa persona residente por duna un kreditor estranhero garantia i
siguridat. (Si a base di e garantia- i siguridatnan otorgá, mester hasi pago di NAf 500.000 òf
mas pa eksterior, mester pidi un pèrmit pa esei sí.)
Kuminsando 1 di òktober 2024, tur petishon di pèrmit di divisa mester ser entregá via un banko di
divisa. Di e manera akí, e klientenan ku tin mester di un pèrmit di divisa por risibí asistensia adekuá,
por garantisá integridat di e transakshonnan di divisa i ta fasilitá introdukshon di un sistema di
petishon di pèrmit di divisa online.
Pronto, e bankonan di divisa por kuminsá entregá petishon via di un online portal riba e wèpsait di
CBCS. Mientrastantu, por baha e formularionan aktual di petishon for di riba wèpsait di CBCS.
Por baha Deviezenregulering 2024 for di riba wèpsait di CBCS, na
https://www.centralbank.cw/legislation-guidelines/foreign-exchange-regulations.
Willemstad, 30 di sèptèmber 2024
CENTRALE BANK VAN CURAÇAO EN SINT MAARTEN
