INTRODUKSHON di PROMÈ MINISTER GILMAR PISAS NA OKASHON DI LANSEO DI ‘2BAYS CURAÇAO

INTRODUKSHON di PROMÈ MINISTER GILMAR PISAS NA OKASHON DI LANSEO DI ‘2BAYS CURAÇAO’

8 di òktober 2024

 

Dama- i kabayeronan, felis anochi!

 

Ku e kambio di identidat di “Refineria di Kòrsou” pa “2BAYS Curaçao”, awe  nos ta dal un paso importante mas den realisashon di e vishon pa futuro di Kòrsou ku mi a bin ta kompartí ku komunidat di Kòrsou for di e komienso di mi Gabinete.

 

Mi ta konvensí ku desaroyo di henter e área rondó di nos hafnan pa finnan ekonómiko, espesialmente desaroyo di nos sektor energétiko, ku mira riba produkshon di energia duradero tantu pa konsumo, produkshon lokal i pa eksportashon ta sumamente benefisio pa futuro di Kòrsou.

 

Ta p’esei nos ta kontentu ku e ‘rebranding’ aki di RdK, pasobra a yega tempu pa un komienso nobo ku un vishon mas amplio ku solamente operá e refineria.

Dia promé di desèmber nos a programa pa habri refineria su portanan atrobe pa produkshon di produktonan petrolero i na mesun tempu a yega ora pa RdK habri su alanan i kuminsá bula visiblemente riba e terenonan ku e ta manehá rondó di Schottegat i Bullenbaai, pa atraé aktividatnan ekonómiko nobo den e áreanan aki.

 

Esaki ta nesesario, pasobra den e próksimo añanan 2BAYS Curaçao mester asistí gobièrnu aktivamente ku maneho ekonómiko, energétiko i infrastruktural, pa Kòrsou alkansá un desaroyo total i sostenibel. Esaki, huntu ku e desaroyo di nos turismo i algun otro desaroyo mas, lo diversifiká nos ekonomia i krea oportunidatnan sin presedente pa invershonistanan. Solamente di e forma aki, dor di uni forsa ku sektor privá den diferente “public-private partnerships”, nos lo por hasi ku di bèrdat Kòrsou lo bira e pèrla ekonómiko di hinter Karibe ku mi ta soña di dje.

 

Awor aki no falta plan, nos a laga traha i aprobá tur e plannan nesesario pa sigui desaroyá nos ekonomia i espesialmente e sektornan di haf i energia. Den e kuadro aki mi ta konvensí ku 2BAYS lo sabi di kolaborá estrechamente ku e otro kompanianan di Gobièrnu ku ta operá den e hafnan di Kòrsou, manera CDM, CPA, Curoil, Aqualectra, Selikor i e kompanianan ku ta liga na nan pa trese e mihó servisio i oferta pa klientenan i invershonistanan.

Ta p’esei mi ta gosa e lema di 2BAYS “Developing Sustainable Business Together. We enable, connect, and transform.” Ban uza nos kapasidat pa konektá ku otronan den mundu. Ban traha riba e hèrmèntnan pa transformá nos ekonomia na bienestar di futuro generashonnan.

 

Nos promé ‘test-case’ pa esaki ta e kontratonan di Lease ku RdK a sera ku Oryx i Global Oil. Ku esaki nos a demostrá ku nos tin e kapasidat pa trese partnernan nobo pa bin invertí den nos pais, partnernan ku potensial den merkadonan mas grandi ku di nos.

Di e forma aki nan lo por yuda nos mes kompanianan aselerá nos kresementu ekonómiko den e añanan ku ta bini.

 

Meskos ku Oryx i Global Oil, unu prosedente di Medio Oriente i e otro di Merka, otronan lo bini di Latino Amérika, Europa, Asia, Merka i Medio Oriente pa hasi negoshi akinan, amplia i diversifiká e base di nos ekonomia.

 

E pèrla di Karibe ku nos ta soña di dje no ta dje leu ei den futuro manera poko di nos ta pensa. E ta mas serka ku nos por imaginá nos. Ku partisipashon di invershonistanan nobo, 2BAYS por yuda gobièrnu aselerá e proseso di kresementu ekonómiko na bienestar di pueblo di Kòrsou.

 

Nos gobièrnu realmente ta kere den esei i ta trahando duru pa logra e metanan aki huntu ku 2BAYS i otro kompanianan di gobièrnu ku ta kla pa ‘bula aden’. Den e lunanan benidero nos lo bai hasi sierto anunsionan ku lo demostrá ku realisashon di nos vishon ta mas serka ku nos ta pensa.

 

Por último, komo representante di akshonista, mi ke felisitá maneho i hunta di Komisario di RdK pa dal e stap krusial aki pa kambia e identidat di e kompania, pa asina duna direkshon den e kambio di kultura i vishon ku mester tuma lugá, pa alkansá metanan grandi pa nos pais. Pabien 2BAYS! Hopi éksito i bendishon riba e kaminda nobo ku a stipulá pa bo i danki RdK pa bo mihó servisionan i kontribushon na komunidat di Kòrsou durante e dékadanan ku a pasa!