“Serka Serka” nobo pa Icons feat. Dju Dju V

“Serka Serka” nobo pa Icons feat. Dju Dju V

WILLEMSTAD/  Resientemente ICONS a estrená un asina yamá ‘visualizer’ di Dju Dju V p’e kansion ‘Serka Serka’. E kansion ta publiká kaba riba e albùm Iconicprint sinembargo awor ta haña bida ku e produkshon visual riba Youtube. E kansion ta papia di un konekshon profundo: un hende por ta leu pero tòch serka den hopi forma. Djuric Virginie mes a komponé e kansion i mester bisa ku e ta ‘fit’ den tur situashon, relashon òf sirkunstansia di bida. “Serka Serka” a keda areglá dor di Jonathan ”Catan” Carolina. No ta promé biaha ku e kombinashon di Djuric i Catan ta produsí un hit, nos por kòrda den pasado “Wauw Effect” i “Awor bo tin ku bai” i resientemente “Sigui Bo Way”. Dju Dju V aktualmente tin diferente kansion zonando simultáneamente na radio i ta keda un di e kantantenan hopi stimá na Kòrsou. For di awe por solisitá “Serka Serka” di Dju Dju V na bo radio faborito i stream riba iTunes/ Spotify/ Tidal/ Apple Music. Ta invitá fanátiko- i siguidónan pa suskribí n’e kanal di KJ74 Entertainment riba YouTube i sigui sostené nos artistanan.