Apertura i remodelashon di sala di bishita na SDKK

Apertura i remodelashon di sala di bishita na SDKK

WILLEMSTAD: djaluna 28 di òktober 2024 a tuma lugá apertura ofisial di e sala multifunshonal di bishita pa famia i tambe remodelashon di e sala di bishita diario na Sentro di Detenshon i Korekshon Kòrsou.

Den presensia di klientenan, personal di SDKK i demas invitado a hiba palabra direktor suplente sr.Anthony Hasselmeijer ku enfatisá riba tur e logronan den kuadro di resosialisashon i tambe e meta di e sala multifunshonal di bishita pa famia i tambe a hiba palabra Minister di Hustisia sr. Shalten Hato.

E meta di e sala multifunshonal di bishita ta pa konektá e klientenan ku nan famia muy espesial ku nan yunan. Mas aleu a remodelá e sala di bishita diario pa asina krea un ambiente mas agradabel durante di bishita entre e kliente i su ser kerí.

E seremonia a terminá den un ambiente festivo, kaminda ku Minister di Hustisia a habri e sala multifunshonal di bishita pa famia ofisialmente konhuntamente ku e personal di SDKK i e klientenan ku a traha durante e preparashon pa ku e sala aki.

Gerensia di SDKK  ta sumamente kontentu ku e desaroyo aki i lo keda traha na bienestar i resosialisashon di nos klientenan.

Kòrsou, 28 di òktober 2024