Toespraak van minister Javier Silvania betreffende Aqualectra

Estimado presentenan, miembronan di prensa, siudadanonan
di Kòrsou,
Bondia i masha danki pa boso presensia.
Nos ta na un momentu krusial den e lucha kontra di pobresa di koriente i awa na Kòrsou. E pandemia
mundial a dal nos pais hopi fuerte, i hopi di nos siudadanonan a konfrontá retonan finansiero. Ounke
entretantu nos ekonomia a rekuperá, lastimamente e desaroyonan positivo di nos ekonomia no a alkansá tur
kas di famia. Ainda tin hopi famia ku tin difikultatnan finansiero, i konsekuentemente no por paga nan
resibunan di awa i koriente na tempu. Esaki a kondusí ku a deskonektá nan for di e fasilidatnan di promé
nesesisat akí.
Afortunadamente awor aki tin un maneho nobo ku si ta tuma e kuestion aki na serio i ku a atendé esaki ku
konvikshon i deternimashon, di forma ku e kasnan di famia aki porfin por a haña e ayudo ku nan ta meresé
ya pa largu tempu.
Awe mi ta trese un mensahe di speransa. Un mensahe di alivio, pa hopi kas di famia, ku lo por mira un
mehorashon di nan kondishon di bida.
Gobièrnu di Kòrsou, huntu ku Aqualectra, a elaborá un plan sólido pa atendé e situashon aki. Nos ta
rekonosé ku koriente i awa ta nesesidatnan básiko, i nos ta komprometé nos mes pa perkurá pa ningun
siudadano tin falta di e fasilidatnan esensial aki.
E realisashon di e plan aki ta danki na esfuersonan konhunto di Jason Fulinck, Hefe di Gabinete di Ministerio
di Desaroyo Sosial, Labor i Bienestar (SOAW), i parlamentario Michelangelo Martines di e partido polítiko
Kòrsou Esun Mihó (KEM). Dor di traha na un forma estrecho i kolaborativo, i buska solushonnan
konstruktivo, nan a logra habri kaminda pa e inisiativa importante aki, ku lo tin un impakto direkto riba kalidat
di bida di hopi kas di famia na Kòrsou. Masha danki, Loo i Jason!
Kiko e plan ta enserá?
E akuerdo ku nos ta presentá awe, ta dirigí su mes riba dispensashon i saneamentu di debenan di 1.345 kas
di famia, ku dia 20 òktober 2024, tabatin un saldo habrí na Aqualectra i ku ta mas ku 31 dia deskonektá for
di awa i koriente.
Nos a akordá ku e total di debenan habrí di e kasnan di famia aki, ku huntu ta suma 11.6 mion florin, lo ser
repartí di e siguiente manera:
50% di e debe, ku otro palabra 5.8 mion florin, lo ser kubrí dor di gobièrnu di Kòrsou.
25% di e debe lo ser kanselá dor di Aqualectra, esaki konforme su proseso regular di evaluashon di
kapasidat di pago i kanselashon.
E sobrá 25% ta ser pagá dor di e kliente mes pa medio di un areglo di pago, kaminda lo tene kuenta ku
nan kapasidat di pago.
Den kuadro di e areglo di pago, lo usa un sistema di pré-pago òf pago adelantá. E sistema aki ta duna
kasnan e oportunidat pa paga nan kuenta di awa i elektrisidat adelantá, mientras un parti chikitu di e suma
pagá ta wòrdu deskontá outomátikamente pa kubri e debe pendiente. Na e manera aki, kada pago ta
kontribuí gradualmente na e areglo di pago pendiente, sin pone un peso finansiero ekstra riba e kas di
famia. Esaki ta fasilitá e proseso di pago bèk i ta duna kasnan di famia e posibilidat pa kontrolá nan konsumo
i gastu mihó.
Ademas tin un areglo spesial pa e siudadanonan di mas vulnerabel. Pa e kasnan di famia ku un entrada te ku
salario mínimo, gobièrnu lo tuma 75% di e debe riba dje, i Aqualectra lo kanselá e 25% sobrá di e debe.
E kontribushon di gobièrnu, 5.8 mion florin lo ser repartí dividí riba un periodo di tres aña. Esaki ta nifiká ku
gobièrnu lo transferí 1.93 mion florin pa aña na Aqualectra, inisiando na 2024 i finalisando den 2026.
Kiko esaki ta nifiká pa e kasnan di famia envolví?
Danki na inisiativa kolaborativo aki, e kas nan aki lo por tin akseso bèk na awa i koriente promé ku dianan di
fiesta. Esaki no ta duna solamente alivio, pero e ta tambe un paso importante den e mehorashon di
kondishon di bida di hopi famia.
Responsabilidat i konsientisashon
Huntu ku e sosten finasiero tin algun kondishon importante ku e grupo di enfoke aki mester kumpli kuné pa
keda na remarke pa e programa aki. E kondishonnan aki ta esensial pa evitá ku e kasnan di famia aki ta
bolbe haña nan mes ku dífikultat pa paga. E kondishonnan ta lo siguiente:
1. Pago na tempu: Klientenan mester mantené nan mes na e areglo di pago i e terminónan palabrá.
Inkumplimentu ku esaki por kondusí na eksklushon for di e programa.
2. Partisipashon na programanan di konsientisashon: E kasnan di famia aki ta obligá na partisipá na
seshonnan edukativo tokante di uzo di koriente i awa, organisá pa Ministerio di Desaroyo Sosial, Labor i
Bienestar (SOAW). E seshonnan aki ta yuda famianan pa manehá nan uzo di un forma mas mihó i evitá
debenan den futuro.
3. Koperashon ku instalashon di e meternan inteligente: Klientenan mester koperá ku e instalashon di
meternan inteligente i meternan di ‘Pagatinu’, ku ta yuda nan kontrolá nan uzo i mantené nan gastu bou di
kontrol.
E kondishonnan aki ta esensial pa perkurá ku e ayudo ta efektivo i ku e kasnan di famia aki por mantené nan
mes finansieramente stabil riba un término largu.
Un esfuerso den konhunto
E plan aki lo no por tabata posibel sin e esfuersonan di hopi. Mi ke gradisí Aqualectra pa nan disponibilidat
pa buska un solushon huntu ku nos. Tambe mi ke yama danki na mi koleganan di e Ministerio di Desaroyo
Sosial, Labor i Bienestar, i naturalmente na tur otro partner ku a kontribuí na e inisiativa aki.
Pa finalisá
Damas i kabayeros, esaki ta un momentu importante pa Kòrsou. Nos a dal un paso grandi pa atendé ku e
pobresa di koriente i awa i asina sostené nos siudananonan den tempunan difísil. Gobièrnu ta bai repartí su
kontribushon di 5.8 mion florin riba un periodo di tres aña, pa asina nos por repartí e preshon finansiero i na
mes momentu ofresé solushonnan efektivo.
Tambe mi ke enfatisá ku a elaborá un prosedura spesífiko pa e hogarnan ku ta bin na remarke pa e areglo
aki. Nan lo ser invitá personalmente pa bishitá e kantor di Aqualectra riba sierto dianan. Durante e sitanan
aki lo hiba kòmbersashon tokante e kondishonnan pa e rekonekshon, i tambe firma e akuerdonan nesesario,
pa asina nan por tin akseso bèk mas pronto posibel na awa i koriente.
Mi ta spera ku e plan aki lo trese e alivio nesesario pa e kasnan di famia envolví i ku esaki rekordá nos tur kon
importante ta pa nos traha huntu na interes i bienestar di nos komunidat.
Masha danki pa boso atenshon. Na e momentu aki mi ta habri espasio pa eventual preguntanan.
Javier Silvania
Minister di SOAW
Minister di Finansa
Minister di GMN
