Grandinan ta bisa maske pushi drumi den fornu e no ta bira pan

Komunikado di Prensa – For di Ministerio di Finansa
Grandinan ta bisa maske pushi drumi den fornu e no ta bira pan
Wilemstad, 3 novèmber 2024 – Resientemente partido MAN-PIN a saka un komunikado di prensa
kaminda nan ta referi na un informe di e komishon ku a evalua Korsou su maneho finansiero den konteksto
di e asina yamá Rijkswet financieletoezicht. Lamentablemente partido MAN-PIN ta purba di trese konfushon
den pueblo ku nan insistensia ku Korsou a registrá un defisit tantu pa aña 2022 komo 2023.
Komo ku aparentemente partido MAN-PIN no ta kompronde finansas públiko mi ta kere ku ta nesesario ta
aklará algun konsepto básiko. Ta asina ku un presupuesto no ta nada mas ku un proyekshon di lokual nos ta
spera di resibí komo entrada durante un aña na un banda i na otro banda lokual nos ta spera di tin komo
gastu durante mesun periodo a base di e informashonnan na e momento ku e presupuesto ser presentá.
Tambe nos ta pone e sifranan preliminar pa fasilitá un analisis di e proyekshonnan.
Na momento ku ministerio di finansas reuní tur e sifranan real, e resultado preliminar ta ser kambiá den e
resultado definitivo. Partido MAN-PIN ta ninga di akseptá esaki i ta sigui insistí pa referí na e sifranan
preliminar den nan komunikado. Den un post titulá “Desordu riba presupuesto” un di e dirigentenen di
MAN-PIN Suzy Camelia-Romer ta usa sifranan preliminar di presupuesto pa tira santu den bista di pueblo. E
ta usa e rekapitulashon R2022 i R2023 kaminda e lèter “R” ta referí na voorlopige realisatie cijfers. Ta
evidente ku su obhetivo no ta pa eduká e pueblo sino trese konfushon i konsekuentemente duda den nos
finansas públiko ku tur su konsekuensianan pa nos klima di inbershon. Esaki ta splika e gran frakaso di e
gobierno anterior den maneho di nos pais.
Den e mesun informe ku partido MAN-PIN ta referí na dje kaminda a evaluá e maneho finansiero di pais
Korsou, e komishon a pone bon kla ku apesar ku tantu den presupuesto di aña 2022 komo ku esun di aña
2023 a ser entregá ku un defisit, a resultá ku pa tantu 2022 komo 2023, pais Korsou a realisá un surplus. Pues
kontrali na loke partido MAN-PIN ta pretendé pais Korsou no tabatin defisit durante aña 2022 i aña 2023.
Apesar di e hecho ku partido MAN a okupa e kartera di finansas den e gobierno anterior nos tin ku konkluí
ku nan no konose finansas públiko. Manera nos grandinan ta bisa: “Maske pushi drumi den fornu e no ta
bira pan.”
