Wikènt tras di lomba Kòrsou a sakudí ku alabansa i adorashon durante Rejoice Worship Festival

 

Willemstad- Djabièrnè i djasabra último Kòrsou a eksperensiá dos anochi di alabansa i adorashon espektakular durante Rejoice Worship Festival, organisá pa HowRadio 90.9 fm. Durante e dos anochinan aki e parkeerplaats di iglesia House of Worship tabata totalmente yená ku un públiko impreshonante ku a alabá i glorifiká Dios na gran manera.

Grandi i chikí por a disfrutá di Dios Su presensia via di presentashonnan di diferente artista di gòspel lokal i internashonal for di Estados Unidos, Hulanda, Colombia, Aruba, Boneiru i Kòrsou.

Arias Ykwii di Estados Unidos, Willy Rodriguez di Hulanda, Luigi Cortes di Aruba, Angelique Klooster, Proskuneo, Liesella Geertruida-Thomas, Nathan Senchi di Boneiru, Juan Caraballo di Colombia, Shelomi Doran-Bakhuis, Jeridee “Deetje’ Coco i hopi artista mas a duna presentashonnan ekselente riba nivel musikal haltísimo, akompañá pa nan banda “live”. Tambe tabatin presentashon di muchanan di Dance Academy How To Dance, Kids United i Muchanan Balente College.

Ambos anochinan di e festival tabatin asistensia masal. Impreshonante tabata pa mira kuantu talento lokal tabatin durante e festival ku a akompañá e artistanan internashonal. Tambe algu ku sigur a impaktá tabata riba e último dia di e festival, kon na momento ku áwaseru a kuminsá yobe i e públiko no a laga esaki stroba nan i a sigui alabá Dios te na final di e festival. E áwaseru ku a kai pa un ratu kòrtiku no a stroba e festival di kontinuá, pero hustamente a sòru pa e alabansa i adorashon intensivá. Algu sigur hopi remarkabel.

E anochi a kulminá ku un presentashon sublime di Willy Rodriguez i Angelique Klooster, akompañá pa Proskuneo. Hopi tabata e palabranan di elogio ku HowRadio a risibí pa e gran festival aki.

Un kos nos por mira ta ku e pueblo di Kòrsou tin hopi nesesidat di mas eventonan manera esaki, pa konhuntamente komo un nashon nos alabá i glorifiká Señor Dios.