Gobièrnu ta konfirmá akuerdo pa pagamentu di Selikor pa 2024

Willemstad, 12 di novèmber 2024 – Den un karta ku gobièrnu di Kòrsou a dirigí na Selikor N.V. resientemente, gobièrnu a aklará kua kompensashonnan lo ta disponibel pa e servisio duná den 2024. Ounke Selikor a proponé un suma mas haltu inisialmente, despues di a hasi evaluashon, gobièrnu a disidí pa otorgá un kompensashon máksimo ku ta kuadra den e presupuesto disponibel. E pagonan mensual na Selikor a kuminsá for di yanüari 2024 i ta ehekutá riba un base konsistente.

Gobièrnu ta kumpra servisionan spesífiko

Gobièrnu a indiká ku e siguiente servisionan ta forma parti di e servisionan regular ku lo otorgá un kompesashon pa nan den 2024:

● Rekolekshon i prosesamentu di sushi di kas

● Rekolekshon I prosesamentu di sushi gròf di kas

● Servisio di limpiesa i sanashon den sentro di siudat

● Limpiesa di lèntfelnan ílegal

● Rekolekshon i kimamentu di kadaver di bestianan enkontrá riba kaya públiko

● Rekolekshon di sushi di negoshinan den sentro di siudat

Spesifikashon di pagonan

Pa 2024, gobièrnu a asigná un suma total di máksimo 30,414,500 florin. E suma aki ta dividí den pagonan mensual, asignashon di un biaha pa proyektonan di limpiesa i adelantonan pa tiramentu grátis di sushi.

Reakshon di gobièrnu

Minister Javier Silvania di Salubridat Públiko, Medioambiente i Naturalesa a deklará: “Gobièrnu ta dediká na brinda un medio ambiente limpi i bibabel pa tur habitante di Kòrsou. Nos ta logra esaki dor di traha huntu ku Selikor pa logra solushonnan sostenibel pa maneho di sushi, miéntras nos ta atendé na un forma responsabel ku fondonan públiko. Nos ta spera ku Selikor ta kumpli estriktamente ku e akuerdonan i ta operá den e presupuesto disponibel.”

Gobièrnu ta suprayá ku Selikor mester kumpli ku su obligashonnan ku Servisio di Impuesto na tempu, entre otro, ku e pagonan di primanan sosial i impuestonan. Solamente despues di risibí prueba di pago gobièrnu lo transferí e montante restante.