Global Entrepreneurship Week a ranka sali ku un variashon amplio di aktividat
WILLEMTAD – E siman aki Global Entrepreneurship Week Curaçao a ranka sali ku un seri i aktividat variá den e trayekto ‘On the Road to GEW’. Djaluna Frater Aurelio SBO a inisiá ‘On the Road to GEW’ ku un aktividat ku a tuma lugá na Banko Sentral di Kòrsou i Sint Maarten. E evento a enserá charlanan i diskushon den pènel entre studiantenan i empresarionan eksperensiá. E siman ta sigui ku vários aktividat na e skol mes. Mas aleu den e siman koriente e direktiva di GEW Curaçao ta ofresé diferente webinar grátis na enkargo di miembronan di e direktiva i diferente partner.
Ya for djárason 13 di Novèmber a inisiá un ‘radio quiz program’ ku GEW ta realisá den estrecho kolaborashon ku partner TCFM. Tur dia di djaluna pa djabièrnè,te dia 22, entre 10 or i 12 or, por gana premionan interesante patrosiná pa diferente partner di GEW Curaçao durante di e programa na enkargo di Ulrich Leonora den oranan i mainta na 93.3 FM.
E siman di ‘On the Road to GEW’ ta klousurá djabièrnè ku un evento ouspisiá pa e Ministerio di Tráfiko, Transporte i Planifikashon Urbano ku lo tuma lugá na e ‘Zona pa Empresario’ na Sambil. Minister di VVRP, ing. Charles Cooper, lo habri e evento, siguí pa profeshonalnan di e ministerio ku lo informá di e diferente servisio i produktonan ku VVRP ta ofresé na empresarionan i komunidat en general. E orario pa e seshonnan informativo ta di 14.00 o pa 17.00 or i despues lo tin oportunidat pa tuma informashon ‘one on one’, tuma dokumentonan informativo i yena petishonnan.
Djaluna dia 18 ta inisiá e siman ofisial di Global Entrepreneurship Week, ku ta ser selebrá na mas di 200 pais rònt mundu ku un evento ouspisiá pa Nilda Pinto SBO na PWFC. E skol lo sigui ku eventonan na kol durante di hinter e siman. Pa lat mainta ta sigui pa un evento virtual durante kua sr. Constantijn, di Kas Real Hulandes, lo interkambiá di idea i duna tep na studiantenan di vários skol enkuanto posibilidatnan ku mundu empresarial ta ofresé. Despues di esaki lo tin un webinar virtual grátis den kua un empresario eksperensiá di Costa Rica, Freddy Campos, lo informá di e filosofia di bida na Costa Rica.
Durante di hinter e siman Kámara di Komèrsio tambe lo ofresé webinarnan virtual grátis den kua lo elaborá riba diferente tema interesante. Tambe lo tin workshopnan i seshonnan informativo na enkargo di partnernan di GEW ku ta kubri for di, kon bo ta kuminsá un negoshi, kon bo ta desaroyá bo negoshi eksistente (scale-up) i asta kon apliká Inteligensia Artifisial (AI) den bo negoshi i bida diario. Mei – mei di siman lo tin 2 evento; Gov2Biz i Biz2Biz, ku lo tuma lugá na Chateau Post 5, PWFC. Durante di e eventonan aki lo informá kon negoshinan por implementá digitalisashon i sostenibildat via demostrashonnan práktiko na enkargo di empresarionan ku a hasi esaki di un forma eksitoso. Alabes lo kompartí informashon kon redusí gastu operashonal den un organisashon aplikando teknologia di un forma efikas.
Ma lat den e siman lo tin evento organisá pa MadeInCuraçao, durante kua lo diferente empresario ku ta pèrkurá pa produkshon lokal, lo informá di nan produktonan. Tambe lo tin oportunidat pa ‘tasting’, hasi kontakto direkto ku e produktornan i interkambio di idea entre esnan presente. E evento aki lo tuma lugá na Landhuis Zeelandia. Tur eventonan ta grátis danki na sosten di spònsernan i partnernan pa kua e direktiva di GEW ta sumamente agradesí.
Un organisashon ku tambe lo tene un evento e ‘siman empresarial’ ta Bureau for Intellectual Property (BIP) durante kua lo elaborá kon krese ekonomia a base di edukashon den área di propiedat intelektual . lo tin komo orador internashonal Mathijs Spigt, direktor di Ofisina pa patènt di Hulanda. E evento aki lo tuma lugá na Marriot Curaçao Ballroom. Pa e evento aki i mester paga pa partisipashon.
Ta klouurá Global Entrepreneurship Week Curaçao ku un evento durante kua lo galardoná seis dama pa nan karera komo empresario ku ta kubri dékadanan di trabou ehemplar.
Ta rekomendá pa bishitá e webite www.gewcuracao.com pa mas detaye i registrashon i tambe pa sigui informashon riba páginanan di Instagram i Facebook di Global Entrepreneurship Week Curaçao. Ban duna sosten i kontenido na e lema mundial di e organisashon mama Global Entrepreneurship Network; ‘Entrepreneurship Is For Everyone. Abo tambe!



