Kiko i e Man a yega Kòrsou pa protehá nos mucha kontra abuso seksual

WILLEMSTAD – Den kuadro di un bishita ku Minister di Hustisia, mr. Shalten Hato a
efektuá na Straatsburg den luna di yüni ultimo, e la ehersé un bishitá na Konseho di Oropa
tambe. Durante e bishita aki, nan a introdusí e kampaña “Kiko i e Man”, un kampaña di gran
importansia pa protehá nos mucha kontra abuso seksual. Awe, 18 di novèmber 2024 ku
orguyo i determiná pa stimulá protekshon pa nos muchanan, Minister di Hustisia Shalten Hato
a lansa e kampaña aki na Kòrsou, ku meta pa eduká nos komunidat i duna nos mucha e
konfiansa pa defendé nan mes.
Kiko i e Man: Siña nos mucha protehá nan mes
“Kiko i e Man” ta un kampaña edukativo ku ta hasi uzo di un karikatura amabel, Kiko, ku ta
siña e mucha regla klaro pa protehá nan mes. Un di esnan prinsipal ta ku niun persona no tin
derecho di mishi ku bo parti íntimo. Pa ilustrá e mensahe aki, Kiko ta uza su man komo e
símbolo di kuido i protekshon. Esaki ta un manera visual i simpátiko ku por keda den mente
di nos mucha fásilmente, pa nan sa kiko no ta permití.
Na nivel mundial, investigashon a mustra ku un di kada sinku mucha ta víktima di abusu
seksual. Na Kòrsou, nos no tin e sifra eksakto di kaso di abusu seksual, pero nos ta konsiente
ku e problema ta eksistí i ku esaki ta afektá nos komunidat. Pa esei, e kampaña “Kiko i e
Man” ta bini pa yuda krea konsientisashon den un manera ku muchanan por komprondé i pa
motivá nan pa papia si un persona ta komportá den un manera ku ta pone nan sinti robes.
Bisa algu si algu no ta sinti bon
Un di e mensahe fundamental di e kampaña ta yama e mucha pa bisa algu si nan ta sinti robes
ku manera un persona ta aktua. E slogan ta simpátiko pero direkto: “Si mishi ku bo ta sinti
robes, bisa unbes.” Esaki ta duna un mensahe kla na nos mucha ku nan tin derecho di protehá
nan kurpa i ku ta importante pa papia si algu no ta sinti bon. Kiko i e Man ta yuda nan
komprondé ku nos mayornan ta dispuesto pa tende i protehá nan.

E Kampaña ta adaptá pa mucha di 3 aña bai ariba
“Kiko i e Man” ta spesífikamente adaptá pa mucha di 3 aña bai ariba, ku e intenshon pa siña
nan tempran pa protehá nan kurpa. Pa yega tur hende den nos komunidat, e materialnan ta
prepará na kuater idioma: Papiamentu, Hulandes, Spañó, i Ingles. E materialnan ta inkluí un
buki di Kiko i e Man, ku nos muchanan por les’e i hasi pregunta riba e tópiko aki di manera
ku ta sigur i sin muchu komplikashon.
Konsientisashon pa nos komunidat: UOJZ i ta kontinuá e kampaña di Kiko i e Man
E organisashon hudisial UOJZ ku ta forma parti di Ministerio di Hustisia ta enkargá di
kontinuá ku e kampaña di konsientisashon na skolnan, na komunidat i riba medio digital. E
kampaña ta konsistí di vários forma di material ku ta permití diferente manera di
komunikashon: tin un mural ku lo ta pintá den un área públiko pa trese e mensahe na bista di
tur hende, un konvoi ku lo rekoré skolnan pa eduká i trese konsientisashon, bukinan i
puzzlenan pa nan hiba kas i siña riba, material di informashon digital ku lo publiká riba
Facebook i web, i activity book pa mucha ku ta hinka nan den aktividatnan práktiko i
instruktivo.
Un paso na loke nos realmente ke logra: un komunidat sin abuso infantil
“Kiko i e Man” ta pa trese konsientisashon i pa yuda prevení kaso di abusu den nos
komunidat. Atraves di aktividatnan, muchanan lo siña ku nan no mester keda na sekreto, i ku
si algu ta sinti robes, nan mester bisa algu sin miedu. Nos speransa ta ku tur adulto ku tin
kontakto ku mucha tambe ta yena ku e mensahe di protekshon i yudansa, pa huntu nos por
krea un komunidat seguro i digno pa nos mucha.
Pa mas informashon riba e kampaña, boso por keda sigui e aktividatnan di UOJZ i medio di
komunikashon lokal. Kiko i e Man a yega Kòrsou ku un meta klaro i di grandi balor: protehá i
eduká nos mucha pa un futuro mas sigur