Pidi’é i disfrutá di dje na bo emisora preferí: VivaKids RecycleBand ku otro kantika yen di sous titulá ‘DJUS’

Willemstad- Vivakids recycleband ta na kaminda pa 8 aña di eksistensia. Den e 8 añanan akí,
konstantemente e banda a sa di deleitá Kòrsou, Aruba i Boneiru ku músika i kantikanan hit
interpretá riba nan instrumèntnan di material resiklá. Ku hopi alegria i orguyo, VivaKids
Recycleband ke bolbe lansa otro tremendo kansion titulá ‘DJUS’.
‘DJUS’ tin un ritmo masha kontentu, kompositá pa e muchanan di VivaKids mes huntu ku lider
di e banda i artista multitalentoso, Omar Sling. E kansion ‘DJUS’ ta konta di e importansia pa
bebe awa, lokual ta deseo di kada mayor, i e otro banda di e medaya kual ta e mucha ku ta
buska kualke preteksto pa e bebe djus. Manera e mucha ta bisa den e letranan di kansion por
ehèmpel, “Den djus tambe tin awa, mesun awa ei ta kita bo sed” i asta e mucha ta bai asina leu
di splika bo kon pa traha e djus p’e. E dushi kansion aki, ‘DJUS’ ta zonando for di awe na tur
radio emisora na Kòrsou, kemen bo por pidi’é i disfrutá di dje kuantu ku bo ke.
Ku lansamentu di e kansion akí, un biaha mas e muchanan di VivaKids Recycleband ta
demostrá kon dushi bo por pasa ku kosnan simpel. Sin duda, un i tur ku skucha e kansion akí
por tende kon e ritmonan bon será i e alegria di e muchanan akí ta brota via kada tono di nan
kantika nobo ’DJUS’. Skuch’é i lo bo ripará un biaha mas kon instrumèntnan trahá di entre otro
bleki, wea bieu i pia di fèn por forma un ritmo kan kan di djus.
VivaKids Recycleband ta un proyekto grátis ku a kuminsá na 2017 inisialmente sin intenshon di
a bira un banda. Un grupo di mucha tabata bini huntu tur djasabra den Atelier di Omar Sling na
Seru Fortuna i huntu tabata hasi spèl ku materialnan resiklá, traha instumènt i toka gosa huntu.
Tiki tiki e proyekto a krese bira un banda pa mucha i awe ku hopi orguyo nos por mira bèk riba
diferente di nos muchanan ku a forma parti di VivaKids ku a krese bira hóbennan i awe ta bria
ku nan talento den diferente área rònt Kòrsou. Nos meta ta, pa por sigui kontribuí na e desaroyo
sosial i artístiko di mas mucha i hasi posibel ku kada un por krese huntu ku nos den nan talento
i abilidatnan.
Mientrastantu, VivaKids ta trahando pa pronto realisá e videoklip tambe pa e kansion ‘DJUS’ i
trainingnan ta den ful swing pa e muchanan su promé konsierto di pasku dia 21 di desèmber
próksimo; ‘Fiesta di Pasku den Kaya Katara’ ku ta primintí di ta “sendé”. ‘Fiesta di Pasku den
Kaya Katara’ ta bai ta un fundraising, pa e banda por yega na fondo pa por logra algun di e
soño i metanan grandi ku e muchanan akí tin.
Sigui VivaKids Recycleband riba Facebook, Instagram i Youtube òf mustra nos riba TikTok kon
abo ta gosa bo ‘DJUS’