Selikor ta invertí den mas ekipo nobo

 

Djabièrnè 22 di novèmber, Selikor NV a tene un konferensha di prensa pa duna informashon na komunidat, via di prensa lokal, riba invershon den 5 trùk di shushi nobo ku e kompania a realisá resientemente. Tambe a presentá e kònteiner bou di tera, kual ta un kònteiner pa rekohé shushi i ku ta keda instalá bou di tera. Komo parti di e programa ofishal, Pastor Raul a hasi orashon pa protekshon di tur shofùrnan di Selikor NV.

A tene e konferensha di prensa riba parkeo di edifisio prinsipal na Selikor Parera di forma ku prensa por a tuma nota personalmente di e ekiponan atkerí i mira e kònteiner bou di tera den operashon. Direktor General di Selikor sr. Wesley Kook, kompañá pa Minister Sithree van Heydoorn den representashon di Minister President sr. Gilmar Pisas i Minister di Salubridat Públiko, Medioambiente i Naturalesa sr. Javier Silvania ta esnan ku a hiba palabra na e okashon akí.

Na e okashon akí direktor di Selikor a para ketu na e impakto di e proyekto den kua gobièrnu ta paga pa usuarionan di lèntfel depositá shushi grátis. Sr. Kook a splika ku un estudio resien a indiká ku Kòrsou ta generá pa aña alrededor di 213.000 tòn di shushi. E kantidat akí ta representá 1.300 kilo di shushi ku kada suidadano ta produsí pa aña. Di e kantidat di 213.000 tòn Selikor ta risibí 129.000 tón pa prosesá. E proyekto den kua gobièrnu ta paga pa usuarionan di lèntfel depositá shushi grátis a hiba na un total di 200.000 tòn di shushi depositá den 2024.

Kònteiner bou di tera

E kònteiner bou di tera ta un kònteiner pa rekohé shushi ku ta wòrdu instalá bou di tera. E tipo di kònteiner aki ta wòrdu hañá prinsipalmente den áreanan urbano i ta wòrdu usá pa tene e ambiente limpi i na òrdu.

Kònteinernan bou di tera ta tipikamente trahá di materialnan duradero manera stal òf betòn, i ta diseñá pa wanta e elementonan. Nan ta ekipá tambe ku un sistema hidróuliko ku ta hisa e kònteiner ora e mester wòrdu bashá.

Tin diferente tipo di kònteiner bou di tera, entre otro kònteiner pa shushi general, papel, karton i glas. Algun kònteiner bou di tera ta asta ekipá ku sensornan ku ta midi e nivel di yenamentu, loke ta permití nan basha mas efisientemente.

Pa Selikor e invershon akí ta nifiká un desaroyo den nos sistema di rekohé shushi di forma mas optimal i higiéniko.

Trùk di shushi pa rekohé shushi

Mas aleu sr. Kook a duna un bista riba otro invershon den ekiponan ku Selikor a atkerí den e temporada di aña akí. Ta trata akí di 5 trùk di shushi nobo pa fortifiká e flota di trùk i optimalisá e servisio di rekohé shushi di kas. Ku atkisishon di e trùknan akí por bai nota klaramente un alivio pa loke ta trata e kantidat di ekiponan disponibel i tambe stabilidat den e servisio di rekohementu di shushi di kas.

Selikor NV ta keda invertí den ekiponan nobo pa asina brinda pueblo di Kòrsou e servisio ku e meresé. Nos ta keda hasi nos máksimo esfuerso pa  yega na un servisio di ekselensia i pa un Kòrsou limpi i bunita.

Durante di e enkuentro akí tambe sr. Wesley Kook a hasi entrega ofisial di e relato anual 2023 di Selikor na Minister Sithree van Heydoorn den representashon di Minister President sr. Gilmar Pisas i na Minister di Salubridat Públiko, Medioambiente i Naturalesa sr. Javier Silvania. E relato anual ta konsistí di un relato finansiero ku ya a keda presentá i aprobá pa e hunta di komisario di Selikor anteriormente. Finalmente sr. Kook den su kalidat di direktor general di Selikor NV a hasi uzo di e oportunidat pa ekspresá palabranan di gratitut den direkshon di e Ministernan sr. Pisas i sr. Silvania pa nan kontribushon pa realisá e proyektonan akí ku ta buta nos un stap mas serka riba e kaminda ekselensia.