Kambio di lei den preparashon por hasi Zona Ekonómiko un éksito den region Zona industrial komersial Dokweg un éksito rotundo den ménos ku un aña di tempu
Willemstad, 26 di novèmber 2024 – Den ménos ku dos aña despues ku Curaçao Industrial and
International Trade Development Company N.V (Curinde) a kombertí un parti di e zona ekonómiko
na Nieuwe Haven den un Parke Industrial Ekonómiko, awe na fin di novèmber 2024 esaki a yena, i
hasta tin un lista di espera largu di empresanan interesá pa establesé den e área. Minister Silvania
kende ta lidera e grupo di trabou ku a hasi kambio di leinan posibel ta felisita Gerensha di Curinde
ku e gran logro aki.
Gran parti di e éksito ta atribuí na e lokashon sentral ku ta serka di mayoria aktividat ekonómiko riba
nos isla. CURINDE, Duana i Kuerpo di Seguridat Cursecure, e kuerpo enkargá ku kontrol di e área
aki, resientemente a firma un protokòl ku ta regla e rekisitonan nesesario pa kontrolá e área i pa
garantisá kumplimentu ku lei di impuesto.
CURINDE ta mira un futuro ku perspektiva pa e Zonanan Ekonómiko na Nieuwe Haven i Hato i ku
posibilidat pa krese i sirbi region unabes e konsepto di lei pa Zona Ekonómiko Spesial, ku e grupo
di trabou lidera pa minister Silvania tin den preparashon, keda aseptá i drenta na vigor.
E Parke industrial Ekonómiko na Dokweg ta kubri un área di 25.000 meter kuadrá. E ta konsistí di
edifisionan multifunshonal repartí den “loods” di diferente tamaño. Banda di seguridat 24/7,
CURINDE no ta ofresé insentivonan den e Parke Industrial, manera ta e kaso den tur e otro
parkenan ku CURINDE ta manehá. Empresanan den e Parke Industrial ta paga impuesto di entrada
(invoerrechten) i OB normal.
E promé kompania a establesé promé di ougùstùs 2023. Aktualmente tin 34 kompania establesé
den e parke. Tin empresanan ku varios tipo di aktividat ku ta establesé den e parke industrial
manera por ehèmpel kompania di instalashon i servisio di èrko, almasenahe di kahita/kùp/bowl/tas,
ets, karpinteria i almasenahe di material di konstrukshon.
Nos Zonanan Ekonómiko tin tremendo potensial pa desaroyá den e próksimo añanan.
Aktualmente tin un konsepto di lèi nobo riba mesa pa loke ta Zona Ekonómiko Spesial ku ta
kanando i ta den fase final. Esaki lo kontribuí pa Kòrsou su Zona Ekonómiko ta mas kompetitivo i ku
posibilidat pa ofresé aktividatnan nobo i moderno, den kumplimentu ku rekisitonan di
Organisashon pa Desaroyo i Koperashon Ekonómiko (OECD) i Union Oropeo.
CURINDE ta trahando estrechamente ku partidonan envolví manera Ministerio di Finansa,
Ministerio di Desaroyo Ekonómiko i Duana pa por realisá e kambionan nesesario pa kombertí
Zonanan Ekonómiko bèk den generadónan di mas aktividatnan ekonómiko i mas kuponan di
trabou pa Kòrsou