Komunikado di Prensa – For di e ofisina di Ministerio di Finansa, Javier Silvania

 

Na aña 1993, e ordenansa nashonal ku ta regla online gambling na Kòrsou
(Landsverordening buitengaatse Hazardspelen-LBH) a keda aprobá pa minister di
hustisia di aquel entonces mr. Suzanne Römer. Ehekushon di e lei aki tabata
responsabilidatnan di ministerio di hustisia te ku aña 2019. E lei aki, ku ta konta
solamente 2 página (6 artíkulo) ta laga espasio liber pa ser mal usá manera mafia Ruso i
otro nan a hasi dor di laba plaka.
Di e akuerdo ku LBH Kòrsou por duna pèrmit pa operadornan por brinda servisio di
online gaming for di Kòrsou. Remarkabel ta, ku for di 1993 ku e lei aki a drenta na
vigor, te ku aña 2023, ta solamente 5 lisensia a keda otorgá. Di e 5 lisensianan aki,
solamente 1 tabata brinda e servisionan di online gaming nan mes. E otro 4
kompanianan (e asina yamá master license holders) ku tabatin e lisensianan aki, tabata
otorgá e asina yama sublicentie na kompanianan den eksterior ku ta brinda servisio di
online gaming.
Tambe, gobièrnu di e tempu ei a pone un paro na otorgashon di lisensia bou di LBH,
dunando e kompanianan ku tabata tin un lisensia virtualmente un monopolio riba e
merkado aki. Te dia di awe, no ta konosí dikon gobièrnunan di turno a skohe pa laga e
grupo di “family and friends” aki probechá di e posishon monopolístiko aki sin un
benefisio proporshonal pa pueblo.
E entradanan (lesa: miónes) di tur e sub-lisensianan otorgá pa e master license holders
aki, tabata keda den saku di e 4 famianan ku tabatin un lisensia otorgá pa minister di
hustisia di e tempu ei, Suzanne Römer.
Mester remarká tambe, ku e legalidat di e sub-lisensianan aki no tabata niun kaminda
reglá den lei. Tampoko ministerio di hustisia no tabata tene supervishon riba e sektor
aki manera mester ta. Esaki tabatin komo konsekuensia ku a daña Kòrsou su imágen
riba merkado internashonal, tanten ku gobièrnu di Kòrsou i aun mas importante,
pueblo di Kòrsou, no tabata haña ningun benefisio.
Miéntras ku e master license holders tabata gana miónes den e sektor aki aña aden aña
afó, gobièrnu di Kòrsou tabata risibí apénas Naf. 600.000 pa aña kual ta manera un
drùpel di awa den un panchi kayente. Na 2019 na momentu ku e batata a bira kayente
dor di e daño inmenso ku tabata ser hasí na imágen di Kòrsou, e minister di hustisia di
e tempu Quincy Girigorie probechando di falta di konosementu di e minister finansa a
kuri traspasá e batata kayente na señor Kenneth Gijsbertha.
Na aña 2023, minister Silvania, a disidí ku ta basta ku un grupito chikitu ta daña
reputashon di nos pais i ta bira multimionario riba lomba di pueblo. Minister Silvania a
para e asuntu di master license holders ku ta duna sublicentie. Bou di e sistema di
sublicentie, GCB no tabatin kontrol riba e operadornan ku un sublicentie.
Bou di mandato di minister Silvania GCB mes ta otorgá e lisensia direktamente na e
operador, GCB ta kobra pa e lisensia i si e operador no ta kumpli ku e kondishonnan
bou di kual a otorgá e lisensia GCB por retirá e lisensia. Pues ku otro palabra e sistema
aki ta duna GCB un instrumento ku e no tabatin pa aktua ora un operador aktua kontra
di e kondishonnan di su lisensia. E sen di licensia ta bai den kaha di gobiernu i no den
saku di 4 famia.
Komo tal, minister di finansa Javier Silvania a pidi departamento hurídiko di gobièrnu
(WJZ) pa un konseho. Den e petishon aki, minister di finansa a pidi konseho riba algun
pregunta spesífiko manera por ehempel si GCB por otorgá lisensia bou di LBH.
Konfirme e konseho di WJZ, GCB tin e outoridat pa otorgá lisensia bou di e mandato
ku e tin.
Den otro palabra, ministerio di finansa ni GCB no a aktua kontra lei dor di otorgá
lisensia bou di e lei aktual esta LBH.
E maneho aki a ser introdusí en espera di modernisashon di LBH. Aktualmente ta na
parlamento un proyekto di lei (LOK) ku ta duna GCB mas instrumentonan legal pa por
supervisá e operadornan i asina salbaguardiá reputashon di Kòrsou.
Aparte di e bentaha aki, ya GCB a otorgá mas ku 201 lisensia i a generá pa e aña
koriente mas ku NAf. 14 mion pa kaha di gobièrnu kontrali na e NAf. 600,000 ku
gobièrnu tabata haña den pasado.