Partisipashon SDKK na Markt en Expo di JICN 2024 na Boneiru

 

Willemstad / Kralendijk: Djasabra 30 di novèmber 2024, a keda organisá pa Justitiële Inrichting Caribisch Nederland (JICN) un tremendo Markt en Expo riba e tereno di prizòn na Boneiru. E aktividat akí ya ta un tradishon pa basta aña kaba ku e meta prinsipal, pa brindá e pueblo di Boneiru e oportunidat pa por bin kumpra i ekperensia tur e produktonan i artíkulonan ku e detenidonan ta traha durante nan enkarselashon.

E aña akí tabata diferente i spesial debí ku a dediká e Markt en Expo JICN 2024, na señor Wibo de Vries ku ta e direktor di prizòn na Boneiru ku pronto lo baha ku penshun i señor Karel Martis ku hopi aña a organisá e aktividat aki i a la bes tambe lo bai baha ku penshun bon meresí. Tambe Sentro di Detenshon i Korekshon Kòrsou (SDKK) a partisipá e aña akí na e Markt en Expo JICN 2024.

Na okashon akí tabatei presente señora Sharisa Llewelyn, señor Carl Benita i señor Jabets Pinedo ku na nòmber di prizòn di Kòrsou a hiba palabra i a gradisí pa e oportunidat di por a partisipá i a entrega señor Wibo de Vries un regalo di parti SDKK.

Mas aleu tur presente por a atmirá i kumpra vários produkto i artíkulonan ku a keda trahá pa klientenan di SDKK e.o: tas, pechi, pintura, dekorashon di Pasku, hamaka, Artesania, stul i garoshi di palu i hopi kos mas.

Gerensia di SDKK por mira bèk riba un aktividat eksitoso i siguramente lo bai organisá un aktividat asina aki na Kòrsou tambe.