Hóbennan di formashon social “Sociaal Vormings Traject (SVT)” a risibí nan barèt na Marina Kazèrne Suffisant
Hustisia
Hóbennan di formashon social “Sociaal Vormings Traject (SVT)” a risibí nan barèt na Marina Kazèrne Suffisant
Publiká riba 01 Desèmber 2024
Willemstad – E hóbennan ku a partisipá na “Sociaal Vormings Traject (SVT)” “Un Komienso Nobo” na Marina Kazèrne Suffisant a risibí nan barèt. E grupo di hóbennan aki, bou di guia di Defensa a kuminsá riba dia 19 di ougùstùs 2024 ku e promé fase di e trayekto. Durante un periodo di kuater luna nan a siña den un forma militar norma i balornan tal komo disiplina, rèspèt propio, struktura, resistensia, konfiansa i sentido di responsabilidat.
Un grupo di 8 hóben muhé riba 28 di novѐmber 2024 por a risibí nan barèt ku nan a meresé huntu ku nan sertifikado durante un seremonia kòrtiku ku tur e partidonan envolví.
Siguiente Fase
E 8 hóbennan lo start mes ora ku e di dos fase, e trayekto di aprendisahe (Leerwerktraject (LWT). Durante e fase akí e hóbennan ta kontinuá ku nan preparashon pa un funshon ku ta pas pa nan riba e merkado laboral, di akuerdo ku nan kapasidatnan bou di Guia di GwenInspires. Ku e dos fasenan aki Gobièrnu di Kòrsou huntu ku Defensa ta brinda perspektiva pa futuro na e hóbennan akí.
Realisashon di e Koperashon
E proyekto akí ta keda realisá den e kuadro di palabrashonnan entre Kòrsou i Hulanda, rondó di reformanan den e ‘Landspakket’. E reforma akí ta inkluí bou di e tema ‘H18′ i ta ser designá komo Programa di Formashon Sosial/’Sociaal Vormings Traject’. Ministerio di Hustisia, Ministerio di Desaroyo Sosial, Labor i Bienestar (SOAW), Ministerio di Edukashon, Siensia, Kultura i Deporte (OWCS) i Ministerio di Defensa, tur ta partner den e proyekto akí.
Mart 2025 un grupo nobo lo kuminsá. Ta trata di un grupo di hende hòmber. Ainda tin espasio pa esnan interesá. Bo ta entre 18 i 24 aña, bo por manda nos un mensahe pa mas informashon via WhatsApp na 9 563 6626
Entrega di barèt i sertifikado
