Evangelista Carlos Evans ta na Kòrsou “Resiliensia” Djasabra awor riba Brionplein
Willemstad- Djasabra awor 18 di yanüari lo tin un evento impaktante riba Brionplein titulá Resiliensia. For di 7’or di anochi pueblo di Kòrsou ta keda invitá pa presensiá un anochi di alabansa i speransa. Evangelista Carlos Evans lo kompartí su testimonio di resiliensia komo un eks militar. Den e anochi aki lo tin alabansa i adorashon di Zamar i Proskuneo, tambe lo tin presentashon di nos mucha i hóbennan.
Durante e rueda di prensa, ku a tuma lugá ayera atardi riba Brionplein, Apòstel Clemencio Rodriguez i Apòstel Gilberto Bakhuis a splika ku ta algu grandi pa Kòrsou pa por risibí un evangelista mundialmente konosí pa su testimonio di resiliensia. Ta un previlegio ku Kòrsou a keda skohé pa e gran evento aki.
Carlos Evans a nase na Puerto Rico i ta residensiá na Estados Unidos. E ta un evangelista, motivador i eks sargento di US Marine Corps. Durante su di kuater mishon, el a enfrentá un reto enorme despues di pèrdè su dos pianan i su man robes a konsekuensia di un eksploshon, pero su fe i determinashon a transformá esei den un testimonio poderoso. Carlos a enfrentá entre otro depreshon i adikshon na remedi kontra dolor. Sinembargo, Dios tabatin un propósito divino pa bida di Carlos. Awor, komo fundadó di C.R. Evans Ministries i bosero pa Wounded Warrior, Carlos ta inspirá míles di persona rònt mundu pa sigui nan fe i superá opstákulonan den bida ku resiliensia.
Durante e rueda di prensa Carlos tambe a ekspresá su gratitut imenso di por ta na Kòrsou pa kompartí su historia i tambe ku Dios a mustr’e pa bin Kòrsou entre tur e paisnan grandi ku e ta bishitá rònt mundu.
Banda di esaki Kòrsou tin e honor di risibí Apòstel Raúl Feliciano i Pastor-adorador Luis Raúl Feliciano, ámbos for di Estados Unidos, ku lo akompañá Carlos Evans pa kompartí e mensahe di speransa riba Brionplein. Diferente iglesia na Kòrsou a uni huntu pa organisá e tremendo evento aki ku sigur lo ta di gran bendishon pa nos pais. Pueblo di Kòrsou kompleto ta keda invitá pa tei djasabra awor 18 di yanüari pa 7’or di anochi riba Brionplein pa e tremendo evento Resiliensia.
