Fundashon Famia Plania ta deseá pueblo di Kòrsou kompletu, un felis aña nobo.
WILLEMSTAD- Fundashon Famia Plania ta deseá pueblo di Kòrsou kompletu, un felis aña nobo. Un aña kargá ku bedishon, prosperidat i salú. E aña aki Fundashon Famia Plania ta kumpli 60 aña riba 1 di Oktober 2025. Durante e aña aki, por bai tuma nota ku Famia Plania ta bai para ketu na e logro aki i lo bai selebrá esaki. Banda di esaki, tambe nos a bolbe drenta temporada di karnaval. Kaminda nos sá ku pueblo lo gosa un bòl i disfrutá di tur e kreatividat di nos hende nan.
Sea konsiente durante temporada di karnaval
Manera a bira ta kustumber durante varios aña kaba, Fundashon Famia Plania lo duna su granito na e temporada di karnaval 2025. Den pasado Fundashon Famia Plania a kompartí informashon balioso ku nos komunidat i tambe repartí kondón na aktividatnan i durante marcha nan. E periodo di karnaval, ta unu yen di goso i alegria. Tambe nos ta konsiente ku ta e temporada, kaminda grandi i chikí ta keda eksponé na diferente situashonnan ku kisas por ta mustra inosente, pero ku despues, por tin konsekuensia negativo pa bo futuro i bo salú. Durante festividatnan di karnaval hopi bia tin hopi uso di alcohol. Un persona ku ta bou di influensia di alkohol i òf droga, no por rasoná i tuma desishon nan responsabel. Ta importante pa nos ta konsiente, ku mester haña konsentimentu di e persona enkuestion pa por hasi avansenan seksual.
Si esaki no ta e kaso, evitá di hasi esaki, mirando ku e ta kastigabel pa lei i por keda konsiderá komo violashon. Nos ke alertá un i tur ku tin diferente metodo pa stroba un persona di por rasoná. Pesei ta importante pa disfrutá di e temporada sin pèrdè kabes.
Ta importante pa tur hende ku ta seksualmente aktivo, ta konsiente i praktiká seif sèks. No tin nada malu, ku bo ta kana ku kondon pa hasi sèks. Si bo’n por wanté mas, saké for di bo tas! Serka nos, por kumpra kondon pa solamente Nafl 0,50. Pa un yotín, bo por evitá un chikitin i konsekuensia negativo di sèks parotín. Tambe nos ke probechá i gradisí tur esnan, ku ta kere i mira e importansia di Famia Plania.
Importansia di boluntario i spònsor
Fundashon Famia Plania ta sigi duna guia i edukashon na tur esnan ku tin mester. Pa e motibu aki, nos ta buskando boluntarionan pa yuda nos durante di e periodo aki i henter aña. Nos semper tin mester di boluntario pa por akapará mas tantu hende posibel.
Nos fundashon ta risibí supsidio di gobiernu i donashon di kompania i instansia nan lokal i internashonal. Sin e fondonan aki, nos no por logra konsientisá pueblo i hasi nos trabounan. Nos ta gradisí tur nos sponsernan ku aña pasá, a kontribuí, ku nos por a bolbe hasi nos proyekto pa karnaval 2024 posibel. Fundashon Famia Plania ta spera di por konta ku boso aporte pa e aña aki tambe. Ademas nos ta yama un danki spesial na Minister di Salubridat Públiko, Medio Ambiente i Naturalesa, Señor Javier Silvania, i Service Clubs ku a duna nos e fondonan nesesario pa por a renobá nos klínika i atkerí un vehikulo, pa por hasi e trabounan diario.
Si ta deseá di haña mas informashon, pa kualke instansia òf skol, por tuma kontakto ku nos libramente. Pa esnan ku ke pasa serka nos na klínika, por hasi esaki di Djaluna pa Djabièrnè for di 8’or di mainta pa 4’or di atardi. Nos ta situá na Mgr. Niewindtstraat 38, na Otrabanda den banda di Misa di Santa Famia.
Pa mas informashon por yama: 461 1323 òf manda nos un WhatsApp na +5999 511 1322. Tambe por tuma kontakto ku nos via di mail na info@famiaplaniacuracao.org. Por haña mas informashon riba nos Facebook i Instagram: Famia Plania Curaçao, kaminda nos lo kompartí varios tep i informashon pa e temporada aki.
