Ministerio GMN a hasi inspekshon i no a konstatá petroli den saliña na Libu
Ministerio GMN a hasi inspekshon i no a konstatá petroli den saliña na Libu
Willemstad – Ministerio di Salubridat, Medio Ambiente i Naturalesa (GMN) a tuma nota di un video di señor Ryan de Jongh ku ta sirkulando kaminda ta menshoná ku den e saliña den área di Libu (Weg naar Bullenbaai) lo tin un kantidat grandi di petroli, i ku esaki lo ta originá di un pipa di krudo ku ta kore den e área ei.
Djamars, 14 di yanüari, GMN a hasi un inspekshon na e área aki, i a kana rònt di e saliña pa opservá e tera. Segun e inspekshon visual, GMN no a konstatá ningun superfisie di petroli den e saliña. Djawebs 16 di yanüari, GMN a hasi un di dos bishita huntu ku personal di Oil Terminal Bullenbaai i tambe señor de Jongh pa asina bolbe analisá e situashon.
E suela di e saliña tin un koló un tiki mas pretu, i ta e suela natural ku ta enkontrá den saliñanan aki na Kòrsou. Tambe e tera aki tin un holó fuerte, komparabel na ‘webu putrí’. E holó aki ta bini dor di H2S (Hydrogen Sulfide) ku ta sali for di e sedimento/ tera den e saliña, dor di falta di oksígeno den e awa i sirkulashon di awa. Esaki ta un proseso natural i tambe ta forma un ekosistema di su mes ku ta fasilitá otro tipo di organismonan, por ehèmpel e flamingo i otro tipo di para di kosta, kabaron i diferente tipo di piská. Apesar di e inspekshon visual aki, GMN a tuma muestra di e tera den e saliña i lo laga analisá esaki i komuniká e resultadonan ku komunidat.
Ministerio di GMN ta indiká ku trabounan den área di konservashon ku tambe ta internashonalmente rekonosé komo área di RAMSAR (konvenshon pa protekshon di áreanan akuatiko) ta rekerí komunikashon ku departamentunan di GMN i VVRP pa evaluashon ku sierto trabounan por tuma lugá.