Zita ta siguí traha pa Kòrsou progresá  

Zita ta siguí traha pa Kòrsou progresá

 

Pa Zita Jesus-Leito ta esensial pa Kòrsou tin gobernashon konsistente i integro. Esaki ta importante pa por realisá resultadonan na interes nashonal. Sigun Zita: “Mi mishon ta pa por keda kontibuí na un Gobièrnu ku ta pone bienestar di nos yunan i nietunan na promé luga.” A base di e mishon aki Jesus-Leito a skohe pa sostené e Gobièrnu aktual, pa asina por siguí atendé asuntunan urgente di país.

 

Den e kuadro aki Gobièrnu a añadí Zita Jesus-Leito su eksigensianan adishonal na e Programa di Gobernashon. E puntonan di lansa aki ta dirigí riba kresementu ekonómiko i bienestar sosial. Nan a i ta forma e kompas pa e sobrá periodo di gobernashon aki i muy probablemente pa e siguinte Gobièrnu. Den tiki tempu (for di ougüstus 2024) e ‘team’ di Zita a logra realisa diferente paso konkreto i importante pa logra e metanan stipulá. Esaki den koperashon ku Minister Cooper, kende ta fungi komo Minister di Desaroyo Ekonómiko (MEO). Jesus-Leito ta bisa “Pronto nos lo kompartí den detaye e resultadonan alkansá i nos plannan pa futuro.”

 

E kandidato ku sra. Jesus-Leito a nominá pa e puesto di minister na MEO a hala atras pa motibunan personal. En bista di e elekshonnan ku ta aserkando, Jesus-Leito a disidí di no postulá ningun kandidato nobo. Zita ta splika ku: “Ta mas importante den e fase aki pa nos traha huntu di forma efisiente, stratégiko i pone nos prioridatnan na promé lugá.” No opstante, tur reto huntu ku su tim den den MEO i Parlamento Zita ta keda desidido pa ehekutá i realisá e metanan poné pa Kòrsou den e Programa di Gobernashon.

 

Jesus-Leito no a postulá su mes komo kandidato riba lista di un partido pa e elekshon binidero. Zita ta splika dikon: “Lanta mi propio partido polítiko den un tempu kòrtiku pa mi no tabata un opshon, i mi a skohe konsientemente pa no subi riba ningun lista.” Jesus-Leitu su enfoke ta pa kompletá su periodo parlamentario aktual ku éksito. Zita ta enfatisa ku: “Despues, lo mi sigui hasi esfuerso, di un òf otro manera, pa Kòrsou por tin un gobernashon konsistente, integro dirigí pa realisá resultadonan konkreto na bienestar di nos Dushi Kòrsou”.

Por último, Jesus-Leito ta ekspresá su gratitut na komunidat. “E sosten i reakshonnan positivo di asina tantu hende ta inspirá mi pa sigui hunga un ròl aktivo den futuro di nos Pais.”