Premio UNESCO Curaçao pa Idioma Materno: Papiamentu

INSKRIPSHON TA HABRI PA PREMIO UNESCO CURAÇAO PA IDIOMA MATERNO: PAPIAMENTU

 WILLEMSTAD – Ministerio di Enseñansa, Siensia, Kultura i Deporte (ESKD) i UNESCO Curaçao ta partisipá ku inskripshon pa nominashon di kandidato pa e Premio UNESCO Curaçao pa Idioma Materno: Papiamentu ta bai habri. Periodo di inskripshon ta kore di 8 novèmber 2026 te ku 8 yanüari 2027. Yena e formulario den e link òf scan e kódigo di QR i nominá bo kandidato.

E premio pa aña 2027 ta kubri trabou produsí den 2026 i e aktividat mester a tuma lugá durante di aña 2026. E nominashon mester tuma lugá pa un terser persona sea un institushon, organisashon, grupo di persona òf hurado. E kuerpo di hurado ta disidí si e nominashon ta bálido. E material mester a demostrá mérito ku a sobresalí i ku a kontribuí positivo na desaroyo di papiamentu. Mester entregá tur nominashon na Ministerio di Enseñansa, Siensia, Kultura i Deporte di Kòrsou pa mas tardá 8 yanüari 2027.

UNESCO na aña 1999 a aprobá e Dia Internashonal di Idioma Materno i a selebrá e dia na 2000 pa promé biaha rònt mundu. Na 2003 Antia Hulandes a selebrá esaki pa promé biaha na momentu ku a instituí e premio pa Antia Hulandes pa Minister di Enseñansa i Kultura (e tempu ei). Propósito di e dia aki ta pa konsientisá tur hende tokante balor di idioma, komo un herensia ku humanidat ta kompartí i importansia di e diversidat di idioma. Na Kòrsou e premio ta forma parti di vários aktividat organisá pa Gobièrnu i otronan pa alsa i stimulá idioma materno di mayoria di e poblashon di Kòrsou.

E premio ta pa duna rekonosementu na institushon, organisashon, grupo òf persona den nos komunidat ku a demostrá mérito eksepshonal i logra resultado efektivo ku ta kontribuí na desaroyo di nos idioma papiamentu. Entrega di e Premio aki tin tambe komo meta pa garantisá i mantené simpatia di públiko riba tereno di idioma materno. Tur aña ta anunsiá nòmber di e ganadó(nan) di e premio riba 21 febrüari dia Internashonal di Idioma Materno òf durante di e periodo di lenga materno ku ta di 8 febrüari pa 21 febrüari. Pa mas informashon di nominashon di kandidato tuma nota di e foyeto aki: Folder Premio UNESCO pa Idioma Materno Papiamentu

Por inskribí kandidato pa e premio aki for di 8 di novèmber 2026 te ku 8 yanüari 2027 dor di yena e formulario den e link akí: https://forms.gle/TZCT6f7VqYhKYi5L9 .

Ban sigui motivá nos hendenan pa sigui traha huntu na desaroyo di nos dushi idioma materno:

Papiamentu ku ta e base pa formashon i enseñansa di nos nashon.

—

KOMUNIKASHON

Ministerio di ESKD

Inskripshon QR

Premio UNESCO pa Idioma Materno: Papiamentu