MAN-PIN: Un Vishon pa Bibenda Duradero na Kòrsou

MAN-PIN: Un Vishon pa Bibenda Duradero na Kòrsou

 

Eugene Cleopa, komo kandidato pa MAN-PIN, ta orguyoso di por kompartí e kompromiso pa atendé e asuntunan krítiko di bibienda i otorgamentu di tereno na Kòrsou. Vishon di MAN-PIN  ta kla: nos ta boga pa krea un futuro hustu, sostenibel, y prospero pa tur siudadano di Kòrsou. “Pa MAN-PIN akseso na bibienda adekuá ta un derecho fundamental i nos ta komprometé pa hasi esaki un realidat pa kada famia riba nos isla”.

Nos situashon di bibienda aktual ta eksigí solushonnan inmediato i inovativo. Nos ta komprometé na implementá un strategia nashonal di bibienda amplio ku ta priorisá akseso universal na bibienda públiko. Esaki ta inkluí un enfoke riba solushonnan den e prome 100 dianan di nos gobernashon i solushonnan a largu plaso.

Nos lo priorisá bibienda pa individuonan i famianan ku ta eksperensiando òf ta kore riesgo di keda sin kas. Nos lo sostené e reuso di edifisionan bashi, manera skolnan ku no ta wòrdu usá, pa krea bibienda nobo. Banda di esei gobièrnu lo duna supsidio i insentivo fiskal pa pone kasnan bashi bèk riba merkado, speshalmente pa hende lokal. Un norma ku nos lo introdusí a korto plaso ta ku hürmetu di bibienda lo no surpasá 25% di e entrada di un residente.

Nos lo reintrodusí e polítika di legalisá terenonan okupá ilegalmente, permitiendo residentenan pa kontribuí na gobièrnu miéntras tambe ta buska hipotek pa mehorá nan kas.Tambe nos lo traha ku institutonan finansiero pa krea un sistema di hipotek di interes abou pa individuonan ku entrada abou.

Sinembargo MAN-PIN su meta ta pa alehá for di solushonnan temporal i enfoká riba kreashon di solushonnan di bibienda independiente a largu plaso. Nos lo sigurá e finansiamentu nesesario pa eliminá lista di espera pa bibienda públiko i sòru pa semper tin sufisiente bibienda públiko disponibel pa esnan ku mester di dje. MAN-PIN lo garantisá ku tur bibienda públiko ta bon mantené, aksesibel, pagabel, sigur i di kalidat haltu, situá serka di trabou, kuido di salú, transporte públiko, skol i otro fasilidatnan sosial.

Den konteksto di sostenibilidat ambiental, MAN-PIN lo redusí e impakto ambiental di bibienda dor di garantisá ku tantu edifisionan nobo komo eksistente ta kumpli ku normanan haltu di sostenibilidat ambiental, durabilidat, efisiensia di energia, isolashon di zonido i konservashon di awa.

MAN-PIN ta rekonosé ku otorgamentu di tereno hustu i balansá ta esensial pa krea un sosiedat hustu. Nos lo implementá polítikanan ku ta garantisá ku tur siudadano tin akseso ekitativo na tereno. Esaki ta inkluí:  regulá e distribushon di espasio di biba na Kòrsou similar na e Huisvestingswet 2014. E lei hulandes aki tin komo meta pa garantisá un distribushon balansá i hustu di espasio di biba ku reglanan spesífiko pa aloká kas, prevení hürmentu ku turista, i protehá bibienda pagabel. Desishonnan relashoná ku otorgamentu di tereno ta wòrdu tumá a traves di prosesonan transparente, ku envolvimentu di komunidat.

MAN-PIN ta komprometé na krea un Kòrsou kaminda tur hende tin un lugá seif, kómodo, i sostenibel pa yama kas. Nos ta komprondé ku bibienda no ta djis blòki i eternit; e ta prinipalmente dignidat, seguridat i e futuro di nos nashon. Nos ta urgi tur siudadano di Kòrsou pa djòin nos den e mishon vital aki. Huntu, nos por konstruí un mihó futuro pa nos isla.