‘Stanley Clementina ta lansa ‘road fire’ kandela titula ‘Sak Bo Piki’

‘Sak Bo Piki’ ta sigui e hit pehagoso di KOMEHEIN ku a re-introdusi nos na e talento di Stanley Clementina na 2018. Tambe Stanley ta poniendo e toke final na su tumba i ta ensayando ku Excellence, e banda hoben ku semper a kompane durante Festival di Tumba.

Stanley ta konosí pa su piesanan unda tiki kómiko i kisas asta un poko dòbel sinti. Ku ‘Sak Bo Piki’, Stanley ta motiva espesialmente e damitanan pa sak i piki e ambiente. Ta prome biaha ku Stanley ta kolaborá e talentoso músiko i areglista Xemio Jacobs, mihó konosí komo Mr. Magic. Den ‘Sak Bo Piki’, Stanley a toka e bas afrikano estilo di Congo, i Xemio a toka tur sobra instrumento. Xemio a kompronde mesora kiko tabata e vishon musikal di Stanley i huntu nan a rafina e areglo. Ya e dos titan musikal ta trahando riba algun produkshon adishonal ku nan lo lansa den futuro. Ku ‘Sak Bo Piki’, Stanley ta introdusí un baile nobo, unda e kabayero ta tira su lensu abou i e dama ta sak yongotá i piki’e.

Aktualmente Stanley ta na Kòrsou pa su di kuater partisipashon den Festival di Tumba, unda ela opta pa atrobe bai ku e banda Excellence. Despues di inskripshon pa Festival di Tumba 2025 djadumingu último, ya e antisipashon pa Stanley su tumba ta kresiendo bou di su fanátikonan. E añanan anterior Stanley a marka pouta ku su interpretashonnan melódiko i diferente.

Na òktober 2024, Stanley a kompañá kantante Jayh Jawson pa dos presentashon importante durante AFAS LIVE na Hulanda, pa ken e tin algun aña kaba ta funkshona komo su direktor musikal. Tambe Stanley a kompañá e duo popular di músika urbano antiano, Area 51, ku pa promé biaha despues di dies aña tabatin algun presentashon na Boneiru i Kòrsou. Tambe Stanley tin mas kantika na kaminda i ya ta den studio pa enfoká riba su propio produkshonnan. Na fin di februari, Stanley ta bai lansa un kantika ku ta bai dal duru ku Jandino Asporaat i Dongo.

Pues keda sigui Stanley riba su retnan sosial, unda bo por mande bo koreografia di Sak Bo Piki i e mihó interpretashon lo gana un premio atraktivo. Pa sigui Stanley su desaroyonan, por akudí na e página sosial di Stanley Clementina na Facebook.com/stanley.clementina i Instagram @stanleyclementina.