PROME MINISTER LO TA ATENDIENDO E SIMPOSIO ORGANISA PA BANCO CENTRAL RIBA “E EFECTO CU GOBIERNO TIN RIBA E ECONOMIA”

 

Prome Minister Evelyn Wever-Croes:

Relaciona cu su biahe pa Corsou

PROME MINISTER LO TA ATENDIENDO E SIMPOSIO ORGANISA PA BANCO CENTRAL RIBA “E EFECTO CU GOBIERNO TIN RIBA E ECONOMIA”

ORANJESTAD – Diabierna mainta Prome Minister Evelyn Wever-Croes a sali pa Corsou riba un invitacion cu su persona a ricibi di Banco Central di Corsou pa atende un simposio riba e “Footprints of Government on the Economy”, e Efecto cu Gobierno tin riba e Economia.

 

Prome Minister ta atende e simposio aki hunto cu Prome Minister di Corsou y Sint

Maarten pa asina haya sa mas riba kico ta e recomendacionnan pa cu desaroyo economico y e rol cu Gobierno lo tin pa cu esaki. Despues di e simposio, Prome Minister ta reuni cu prome Minister di Corsou y Sint Maarten pa asina pasa riba varios tema pendiente manera e posicion di e paisnan den Reino, e desaroyonan nobo den Reino y con e islanan por traha mas cu otro.

 

Prome Minister a indica cu apesar cu e ta den un posicion como Prome Minister demisionario, e lo sigui haci e trabounan necesario, y lo sigui cumpli cu su responsabilidadnan. E relacion entre Aruba, Corsou y Sint Maarten ta uno hopi importante no solamente pa e Gobierno aki sino pa cualkier otro Gobierno cu Aruba lo conoce den futuro.