Minister Silvania ta gradisí tur dono di kacho ku a akudí, Ban topa pa chip kachó na SDK a kibra tur rekòrt

Minister Silvania ta gradisí tur dono di kacho ku a akudí,
Ban topa pa chip kachó na SDK a kibra tur rekòrt

Willemstad- Djasabra último a tuma lugá e di tres ban topa kaminda doñonan di kachó
por a akudí pa chip i eventualmente traha sita pa laga sterelisá. E tremendo ban topa
aki a tuma lugá na Sentro Deportivo Kòrsou i a keda organisá pa e proyekto Bienestar
di Animal di GMN huntu ku organisashonnan no gubernamental ku ta atendé ku e
problemátika di kachó na Kòrsou. Aproksimadamente 400 kacho a keda di chip kual ta
un rekòrt pa e proyekto. Tambe un total di 34 sita a wòrdu trahá pa sterilisá kachó. E
petishonnan pa sita pa sterilisá ta sigui drenta.
For di mainta tempran doñonan di kacho a akudí ku nan animal i e fluho di personanan
ku a presentá a keda haltu te ku 3 or di atardi. Apesar di e fluho grandi di personanan
ku akudí, e chipmentu i e parti atministrativo a kana rápido. Un motibu tambe dikon
doñonan di kachó ta hopi satisfecho ku e proyekto aki ta ku e ta brinda un solushon pa
den kaso ku nan pèrdè nan animal kerí. Meskos ku e dos ban topanan anterior, tabatin
atrobe bouncer i popcorn pa tur mucha ku tabata presente.
E siguiente ban topa ta den luna di mart pero keda pendiente paso lo publiká e
fecha eksakto den medionan di komunikashon. E proyekto i e ban topanan ta
posibel danki na e bon koperashon entre Ministerio di GMN i algun organisashon no
gubernamental manera; Rescue Paws Curaçao i Stichting Dierenhulp Curaçao kual ta
organisashonnan aktivo riba tereno di bienestar di animal. Meta di e proyekto aki ta pa
registrá kachonan i atendé ku e sobre populashon di kacho. Minister Silvania ta gradisí
tur esnan ku a akudí na e ban topa na SDK i asina sostené e bunita proyekto aki na
bienestar di nos animalnan.