Den Ministerio di BPD no ta hala TUTU, ta netamente drecha tur loke años a bai robes

 

Den Ministerio di BPD no ta hala TUTU, ta netamente drecha tur loke años a bai robes

Willemstad   – Minister Hato a keda sorprendí di e echo ku sr. Margaretha di e sindikato ABVO ta hiba mesun retórika ku oponentenan polítiko ta hiba, esta ku kosnan tabata kana bon te na momento ku su persona a bin komo Minister siendo esei no ta e kaso. E bèrdat ta ku na momento ku Minister Hato a asumí e ròl di Minister di Maneho di Gobernashon, Planifikashon i Servisio Públiko (mihó konosí komo BPD) na luna di sèptèmber kaminda el a bin topa un Ministerio basta neglishá kaminda vários akshon mester a tuma lugá promé ku e por a sinta ku sindikato(nan).

 

Durante e último 3 añanan mester a traha riba e retraso inmenso ku tin di e archivonan di personal, pero esaki no a sosodé nunka. Ademas, e organisashon ku ta duna servisio interno ku ta “Shared Service Organisatie” (SSO) tabata kompletamente neglishá i antikuá den su manera di funshoná pone ku tur Ministerio ta reklamá e servisio di e departamento. A asta nombra mas òf ménos 30 persona den servisio sin kana e proseduranan korekto di reklutashon. A bin topa un Ministerio kaminda vários di e departamentonan ta kana den nan propio direkshon sin ku tin un aliniashon di maneho i pa mas ku 3 aña a sinta warda riba implementashon di trayektonan di digitalisashon, inkluso MS365. Finalmente, a bin ta sinta ku sindikatonan den CGOA, pero tin puntonan di agènda ku ta data bèk te aña 2015, pone un duda grandi riba e manera ku Gobièrnu tabata prepará pa hiba e reunionnan di CGOA i yega na resultado positivo pa e empleado.

 

Pues, na unda e Sindikato di ABVO a keda tur e tempu ku e asuntunan aki, ku ta traha na desbentaha di e empleado públiko, a tuma lugá. P’esei ta straña Minister Hato ku awe e mesun sindikato ABVO ta elogiá trabounan di opositornan polítiko ku tabata tin e tarea pa drecha e kosnan ariba menshoná.

 

Aworakí netamente a bin ku kambionan fundamental ku e Minister Hato a skohe pa hasi ku e empleadonan públiko mes. Den ménos ku 1.5 luna SSO a yega na un plan di optimalisashon ku a warda riba dje pa 3 aña. Te asta Konseho di Minister a aprobá esaki durante su reunion di 11 di desèmber último.

 

No a keda na plan so, pasó ya kaba a kuminsá optimalisá e servisio i kuminsá hasi e invershonnan nesesario pa digitalisá i outomatisá e servisio pa asina evitá ku archivonan ta pèrdè i ku kasonan di personal porfin por keda atendé mesora. Riba dje ta bai introdusí un “Service Desk” kaminda ta duna mas atenshon na e empleado públiko pa nan pregunta òf remarkenan ku nan tin riba nan archivo di personal. Ademas, a sòru pa koregí e trayekto di e mas òf ménos 30 personanan ku a tuma inkorekto den servisio i a sòru pa enkaminá un kaminda ku hopi di e empleadonan a keda kontentu kuné.

 

For di sèptèmber ku Minister Hato a sinta a lansa MS365 i mester a drecha vários aspekto di e trayekto aki pa porfin por a kuminsá ehekutá esaki djaluna último den algun Ministerio. Ku tempu lo pèrkurá pa tur hende risibí esaki tambe. A tene vários enkuentro ku e tim di maneho di BPD pa asina aliniá tur pensamentu den 1 direkshon i esaki mas i mas ta dunando su frutanan i Minister a pidi sindikatonan pa posponé e reunion ku sindikatonan den CGOA, netamente pa pidi BPD pa organisá su preparashon na un manera mas mihó pa por logra éksito den e reunion dor di implementá proposishonnan ku tin riba mesa di CGOA. Es mas, vários trayekto di digitalisashon a start ku éksito pone ku tin 1 direkshon fiho kon ta sigui digitalisá Gobièrnu sin ku esaki mester perhudiká ningun trahadó. Finalmente, pago di indeksashon i lumpsum a kana na e manera korekto. A krea un kalkuladó pa tur ámtenar por a kalkulá kiko nan ta bai haña. A pone un seshon di informashon pa informá tur funshonario di HR i e sekretarionan General di e Ministerionan di e pagonan. A asta pone un webinar pa tur empleado por a akudí i haña informashon ken ta bin na remarke i finalmente a akordá ku tur empleado ku nan por laga hasi korekshon via nan funshonarionan di HR pa asina notifiká SSO si eventualmente tòg ta tin un eror, te ku asta a pone un fecha separá pa pagonan koregí. Pues a hiba un trayekto transparente i inklusivo kaminda tur empleado por a duna na remarkenan òf hasi pregunta.

 

Ku tur e esfuersonan hasí e último lunanan Minister Hato ta spera di por risibí un reakshon mas ophetivo i tambe positivo di parti di ABVO pa asina sigurá ku e empleado públiko ta keda mihó sirbí i konsekuentemente nos komunidat