OTRO LOGRO DI MAN-PIN SU VISHON RIBA KRESEMENTU EKONÓMIKO
OTRO LOGRO DI MAN-PIN SU VISHON RIBA KRESEMENTU EKONÓMIKO
Willemstad, Kòrsou – Ku hopi satisfakshon partido MAN-PIN a tuma nota di e desishon di Konseho di Minister di Reino pa gobièrnu Hulandes hasi e fondo “Borgstelling MKB-kredieten” (BMKB) aksesibel pa kompanianan na Kòrsou, Aruba i St. Maarten. MAN-PIN ta felisitá èks Minister Steven Martina ku a lansa e inisiativa pa aksesibilidat na e fondo di garantia huntu ku Gobiernu di hulanda atraves di BMKB , ku a keda ankrá den su maneho ekonómiko durante e periodo di gobernashon 2017 – 2021. Den e maneho aki ta splika kon e aksesibilidat lo mester funshoná i a premirá e impakto ekonómiko basá riba kálkulonan di Banko Sentral (CBCS).
Esaki ta parti di e vishon riba desaroyo ekonómiko, manera esaki a keda formulá for di 2021 den “Korsou t’ei Krese”.
Sostenibilidat di kresementu ekonómiko ta dependé hopi di invershonnan nobo i diversifikashon di ekonomia na Kòrsou. Ku e areglo BMKB finansiamentu pa proyektonan lokal atraves di institutonan finansiero lokal ta bira muchu mas aksesibel i fasil. Finansiamentu di proyektonan ku promé ku akseso na e areglo BMKB no tabata faktibel, awor ta posibel. Esaki na su turno lo tin un efekto grandi riba invershonnan lokal ku ta resulta den kresementu ekonómiko. Mas sèn ta lora den nos ekonómia i mas kupo di trabou lo por habri.
Manera ta premirá e areglo aki lo bira disponibel na september/òktober 2025.
Partido MAN-PIN próksimamente lo bai informá tur esnan lokal ku ta buska finansiamentu pa invershon di e logro aki, pa asina duna un aporte na nos kresemente ekonómiko.
