Parlamento di Kòrsou a risibí bishita di Presidente di ‘Hoge Raad’ di Hulanda.
Parlamento di Kòrsou
Parlamento di Kòrsou a risibí bishita di Presidente di ‘Hoge Raad’ di Hulanda.
Djabièrnè 7 di febrüari 2025, Presidente di Korte Supremo di Hulanda, señora mr. Dineke de Groot a hasi un bishita di kortesia serka Presidente di Parlamento sra. Charetti America-Francisca.
Despues un delegashon di Miembronan di Parlamento , a risibí sra. De Groot, ku tabata akompañá dor di Presidente di Korte Komun sr. Maurits de Kort i Vise Presidente di Korte Komun sra. Maroeska Scholte.
Durante e enkuentro, Miembronan di Parlamento huntu ku Presidente di ‘Hoge Raad’ i Korte Komun, a interkambiá di pensamentu kon por keda informá otro, pa reforsá nan respektivo trabounan komo poder legislativo i hudisial.
Señora mr. Dineke de Groot a keda nombrá komo Presidente di ‘Hoge Raad’ di Hulanda, 1 di novèmber 2020. Korte Supremo ta e korte mas haltu den Reino ku ta trata kasonan sivil, penal i di impuesto. Korte Supremo ta un korte di kasashon. E entidat aki ta evaluá si un korte mas abou (korte den promé instansia i/òf korte di apelashon) a apliká e lei korektamente den un sentensia i si e prosedura a wòrdu siguí korektamente.