SELEBRASHON 54 AÑA DI PARTIDO MAN

SELEBRASHON 54 AÑA DI PARTIDO MAN

Dia 6 di februari último Partido Movementu Alsa Nashon (MAN) a selebrá su 54 aña di eksistensia. E selebrashon aki a konta ku presensia di famia Martina. Den seno di miembronan di MAN -PIN i kompaña ku bendishon di pastor Raul Betancourt a selebrá di un manera digno e 54 aña di partido MAN.

Durante e selebrashon famia Martina huntu ku lider polítiko Giselle Mc William a desvelá pòtret di MAN su lider vitalisio i fundador Dominico “Don” Martina, ku a liderá partido MAN durante 31 aña. Tambe a desvelá e famoso pòtret na Hòfi Joonchi di e ko – fundadornan di partido MAN,  huntu ku un poster ku ta un opsekio di algun aña pasa di Don i su sra vuida, Suze Martina, na partido MAN, ku riba dje e prinsipionan di e partido.

Famia Martina a hasi uso di e oportunidat pa regalá kada kandidato riba lista pa  e próksimo elekshon e buki: “Don Martina , waardig en rechtvaardig “ ku ta relatá bida di Don komo tata, kasa i polítiko, pero aun mas importante e hende ku e tabata i ku a biba balornan manera dignidat humano, hustisia, igualdat i solidaridat. E prinsipionan aki a kore manera un liña kora den su bida.

Giselle Mc William komo lider polítiko a pone durante e selebrashon e lider vitalisio, fundadornan i prinsipionan sentral. Sra. Mc William a inisiá un espasio pa un galeria di historia di MAN. Di e manera aki e famia di MAN-PIN den un ambiente ameno i bunita a finalisá e selebrashon ku un brindis i bendishon.