Landsloterij ta sostené karnaval masalmente ku su kampaña Rin tin tin ki bo ta hasi ku bo florin?

Landsloterij ta sostené karnaval masalmente ku su kampaña
Rin tin tin ki bo ta hasi ku bo florin?
WILLEMSTAD – Landsloterij, ta anunsiá orguyosamente lansamentu di “Rin tin tin, ki’ bo t’ei hasi ku bo florin”, un kampaña sosial, komunitario ku e meta pa sostené Karnaval. E kampaña aki ta ta duna e oportunidat na pueblo di Kòrsou kompletu pa kontribuí direktamente na preservashon i desaroyo di nos fiesta di Karnaval
Bo florin pa Karnaval
Durante e periodo di kampaña, 1 florin for di kada kompra di un pida brièchi lo bai direktamente na FDKK komo organisadó di karnaval di Kòrsou. Lo usa e suma aki pa kubri tur e gastunan mará na entre otro organisashon di eventonan di Karnaval, supsidio di bandanan i dj pa gruponan partisipando na marcha di Mucha i Teener, gastunan di kontribushon na karosanan i otro asuntunan logístiko pa e marchanan en general. E kampaña aki tambe ta konta tambe pa Boneiru i Aruba na unda e kontribushon for di benta di brièchi na islanan aki lo bai UNTAHF di Boneiru i pa SMAC di Aruba.
Bo kontribushon chikí ku premio grandi
E kampaña ‘Rin tin tin’ ta duna un buèlta eksitante na e siguiente sorteo di Landsloterij. Tur kumpradó di brièchi no solamente ta dunando bèk na karnaval, pero naturalmente tin e chèns pa gana manera semper a kustumá di Landsloterij mas ku 1000 premio chikí i grandi ku naturalmente esun mayó di 500.000 florin. Esaki ta e motibu pa uso di ‘Rin tin tin’ ya ku manera den e wega di tapa kara nos ke buska i gara abo ku ta kumpra, kontribuí i kisas resultá ganadó di un di premionan fabuloso.
Nos kompromiso pa nos fiesta kultural
Landsloterij ta situá den Breedestraat, Otrobanda, kaya ku pa añanan tras di otro a sirbi komo esenario prinsipal i últimamente e kaya final di marchanan di Karnaval. Esaki ta sirbi komo èkstra motivashon den nos meta pa duna bèk na komunidat i kontribuí na preservashon di Karnaval. Nos fiesta kultural ku no solamente ta trese alegria pero tambe a bira un pilá ekonómiko fuerte pa nos pais. Ku e kampaña ‘Rin tin tin, kiko bo t’ei hasi ku bo florin?’ Nos ke reenforsá nos kompromiso i duna nos granito pa Kòrsou por sigui konta kuné pa hopi aña mas.
Selebrá ku nos, duna bo kontribushon i gana!
Landsloterij ke enkurashá pueblo di Kòrsou, spesialmente tur ku ta stima Karnaval pa no keda afó di e sorteo aki, kumpra bo brièchi ku chèns riba premionan fabuloso ku alabes lo sirbi komo kontribushon pa un dushi Karnaval. Rin tin tin, awor bo sa kiko bo t’ei hasi ku bo florin!
Nos Karnaval
TeamDongo