Niún penadó lo no pena largu.

Niún penadó lo no pena largu.

 

Ku gran plasėr i satisfakshon suskrito a tuma nota di e desaróyonan tumando lugar den área di Klof ku e meta pa porfin trese iluminashon bèk den e área aki despues di mas ku 20 aña.

 

Manera ta konosi e area aki tin basta aña den un skuridat enorme den oranan di anochi i tambe ta konosi ku e pueblo di Banda Bòu tin mas ku 20 aña ta implorá i sklama pa un yudansa pa ku e area ku no solamente ta sukú anochi, pero ku unda tambe bo telefòn ta pèrdè señal….lokual ta peligrá e situation pa e siudadano.

 

Mesora despues di ku suskrito a bira miembro parlamento na yanuari 2024 i komo un habitatnte di Banda Bòu a duna oído na e grítunan aki di prinsipálmente e pueblo di Banda Bòu a inisiá e proseso pa por trese un kambio na e situation aki di Klof ku de paso ta peligroso tambe.

 

Tumando nota kon e Minister konserní tabata traha ku su kurason pa pueblo, suskrito a manda un karta pa Minister sr Charles Cooper ku e prekupashon aki, algun pregunta i tambe sugerensianan pa huntu wak kon nos lo por a yega na un solushon duradero pa prinsipálmente e pueblo di Banda Bòu ku pa hopi tempu durante diferente gobernashonnan anterior a wordu neglishá.

 

Despues di deliberashonnan ku Minister Charles Cooper i tambe gerensia di Aqualectra finalmente nos a yega na un akuerdo duradero i alentador pa e situation.

 

Klof lo haña iluminashon i esaki ta motibu di e desaróyonan  ku nos por mira awe i durante di e ultimo dianan den e área.

 

Despues di mas ku 20 aña Banda Bòu i su bishitantenan por kanta gloria i bisa na boka duru ku niun penadó lo no pena largu.

 

Nos por mira klaramente ku despues ku kabinete Pisas 2 a sinta konsistiéndo di un promė Minister di Banda Bòu i despues suskrito tambe komo un miémbro di Parlamento di e mesun área, ku Banda Bòu ku pa hopi anja a keda neglishá porfin ta risibiendo atenshon adekuádamente pa poko poko krea asina un Banda Bòu ku mas i mihó posibilidatnan pa nos yu i nos niétunan.

 

Suskrito ta sumamente kontentu ku e desaróyo aki i ta pidi mesora tambe pa laga nos ban kwida e lokualnan ku aworaki ta wòrdu pone komo desaróyo den e área pa asina nos por disfruta di nan pa largu tempu.

 

 

 

 

Bo no por tene un pueblo abòu pa semper i tampoko niun penadó lo no pena largu,

 

No me ta No me..

 

Atentamente bo sirbidó

 

Frenciss Renny Lourens

 

Miembro di parlamento pa partido MFK