Parlamento di Kòrsou Parlamento a trata den un reunion di Komishon Sentral
Parlamento di Kòrsou
Parlamento a trata den un reunion di Komishon Sentral, 1.) “Ontwerplandsverordening houdende regels inzake het toezicht op virtuele activa dienstverleners (Landsverordening toezicht virtuele activa dienstverleners) (Zittingsjaar 2024-2025-232)” i 2.) “Proposishon di Komishon di Salubridat Públiko, Medio Ambiente i Naturalesa na Minister di Salubridat Públiko, Medio Ambiente i Naturalesa enkuanto adaptashon di e formulario di modelo na momentu di otorgamentu di un deklarashon tokante e fayesimentu i e kousa di morto”.
Djárason 12 di febrüari 2025, na inisio di e Komishon Sentral, ekspertonan di Banko Sentral di Kòrsou i Sint Maarten (CBCS) i di Curaçao Fintech Association (CFA) a duna un “technische briefing” relashoná ku “Ontwerplandsver-ordening houdende regels inzake het toezicht op virtuele activa dienstverleners”.
Despues ku kada instansia a duna un presentashon di diferente ángulo riba e tema, Miembronan di Parlamento a haña e oportunidat di hasi pregunta tokante e konsepto di lei di supervishon riba dunadónan di servisio di aktivo virtual. Representantenan di Curaçao Fintech Association a kontestá e preguntanan mesora. Presidente Suplente, sr. Gilbert Doran a skòrs e reunion pa despues di mèrdia kontinuá ku e kontestanan di representantenan di Banko Sentral di Kòrsou i Sint Maarten.
Seguidamente Komishon Sentral a sigui ku tratamentu di e “Proposishon di Komishon di Salubridat Públiko, Medio Ambiente i Naturalesa na Minister di Salubridat Públiko, Medio Ambiente i Naturalesa enkuanto adaptashon di e formulario di modelo na momentu di otorgamentu di un deklarashon tokante e fayesimentu i e kousa di morto”. Sra. Ana-Maria Pauletta, komo miembro di e komishon, a duna un aklarashon di e proposishon. Despues un Miembro di Parlamento a hasi pregunta relashoná ku e tema, ku sra. Pauletta a kontestá.
Na final Komishon Sentral a bai di akuerdo ku e proposishon enkuanto “Adaptashon di e formulario di modelo na momentu di otorgamentu di un deklarashon tokante e fayesimentu i e kousa di morto”. Lo trata e proposishon aki den un Reunion Públiko.
