Kambionan struktural den Salubridat
Kambionan struktural den Salubridat
Akuerdo entre Curacao Medical Center i Analytisch Diagnostisch Centrum
Curacao Medical Center (CMC) tabatin retrasonan di pago grandi na laboratorio Analytisch Diagnostisch
Centrum (ADC) i konsekuentemente, ADC tabata konsiderá pa stòp di duna servisio na CMC. Minister
Silvania a intervení den e kaso aki pa konseho di minister bai di akuerdo ku un asina yamá tripartite
overeenkomst, den kual a regla ku ADC por faktura direktamente na banko di seguro sosial (SVB) na lugá
di manda nan faktura direktamente na CMC. Ku e akuerdo aki, minister a trese un solushon duradero pa
e problemátika aki.
Tarifanan nobo pa Klínika Capriles
E tarifanan di Klínika Capriles i e presupuesto di kuido ku e klínika ta risibí di SVB no tabata sufisiente pa
por kubri tur e gastunan di e klínika. Konsekuentemente, e klínika a hañ’e ku debenan grandi, a
konsekuensia di e tarifanan ku tabata muchu abou. E tarifanan abou aki tambe tabatin un efekto
negativo riba e kalidat di kuido ku e klínika por a brinda na su pashèntnan. Konforme investigashon a
resultá ku e klínika tin un défisit di mas o ménos 3.4 mion pa aña, debí na e tarifanan abou. Minister
Silvania a intervení den e kaso aki i a brinda klínika Capriles un adelanto den fondonan ku nan mester
risibí, pa nan por kubri e défisit. Tambe minister Silvania a logra pa subi e tarifanan di klínika Capriles i
asina eliminando e défisitnan struktural ku e klínika tabatin den pasado. Esaki ta kontribuí na un mihó
kalidat di kuido pa pashèntnan di salú mental.
A instituí un pòst pa dòkternan di kas (Huisartsenpost – HAP)
Minister Silvania a reforma e kuido di urgensia pa pashèntnan pa ku kuido di dòkter di kas dor di
inkorporá un Huisartsenpost – HAP, kaminda pashèntnan por akudí pa kasonan di urgensia, pafó di
orarionan regular di trabou. E HAP ta yuda pa kehonan menor no eskala i bira malesanan ku ta rekerí un
spesialista òf kuido den hospital. Tambe HAP ta kontribuí positivamente na prevenshon, komo ku e ta
yuda pa señalá problemanan di salu na tempu pa asina por evitá komplikashon. Tambe HAP ta kita e
preshon for di Spoedeisende Hulp, di moda ku esaki ta keda disponibel pa kasonan ku ta realmente di
urgensia.
Aktualisashon behoefteraming profeshonalnan di kuido
E último kalkulashon di e nesesidat di profeshonalnan di kuido na Kòrsou a tuma lugá den añanan 2018 i
2019. Pero, sigun añanan ta pasa hopi spesialismo nobo ta bini aserka, pueblo ta enbehesé i ta bini
teknologia nobo. Dor di esei bo tin mester di mas spesialista i otro tipo di spesialismo. Ta p’esei, minister
Silvania a a aktualisá e sistema di komishon rekalkulá pa asina por aktualisá e behoefteraming pa
profeshonalnan den kuido. Esaki ta enserá, ku a rekalkulá e nesesidat ku Kòrsou tin pa spesialista,
dòkternan di kas i otro profeshonalnan den kuido.
A hasi adaptashon di lei pa baha gatu den salubridat
Pa por baha gastunan den salubridat, minister Silvania a hasi e adaptashonnan di lei ku tabata nesesario
pa Kòrsou por importá i usa mas tantu remedi genériko. Ku e bahada aki, remedinan ta bira mas barata i
ta bira mas aksesibel pa esnan ku realmente mester di e remedinan aki.
Trayekto di lei BIG pa garantisá kalidat di kuido
Aktualmente, ministerio di GMN ta den proseso pa inkorporá un BIG register na Kòrsou. Dòkternan ku ta
traha na Kòrsou aktualmente mester ta inskribí na inspekshon di salubridat. E inskripshon aki ta bai
kambia pa un BIG register aki na Kòrsou. E reformá aki tin komo meta, pa garantisá kalidat di kuido na
Kòrsou. Den e lei aki ta stipulá eksigensia ku tur dòkter, spesialista, zùster dentista i te asta dòkter
alternativo mester kumpli kuné pa por ehersé nan trabou na Kòrsou. Den e lei nobo ta bai eksigí un
estudio pa protehá pueblo.
A introdusí diferente programa di prevenshon
Korsou ta move: Pa prevení malesanan ku tin di aber ku estilo di bida, minister Silvania a introdusí
diferente proyekto, dirigí riba prevenshon. Ku e proyekto Kòrsou ta move, a tuma diferente inisiativa pa
promové un bida salu i pa konsientisá pueblo di e importansia di hasi ehersisio i kome salú.
Pendjente di bo djente: E proyekto Pendjente di bo djente ta reintrodusí i modernisá e proyekto di
dentista mobil. Ku un bus di djente, kompletamente ekipá, ta bishita skol, bario i instansianan di kuido
pa asina hasi kuido di djente mas aksesibel pa tur hende. Prinsipalmente pa esnan ku tin difikultat pa
yega na un dentista.
Fundashon prevenshon: den kolaborashon ku Universidat di Kòrsou, fundashon prevenshon a hasi un
investigashon elaborá riba e estilo di bida di pueblo di Kòrsou pa lokual ta trata preshon haltu, diabétis i
sobrepeso. E investigashon aki ta esensial pa por identifiká gruponan di riesgo na tempu i pa desaroyá
intervenshon den estilo di bida. E resultadonan di e investigashon ta yuda funshonarionan i personal di
kuido pa duna desishonnan supstansia sientífikamente tokante prevenshon.
Integrashon di kuido di salu mental
E proseso ta kanando pa integrá tur e instansianan di kuido di salu mental i mehora e kuido di salu
mental na Kòrsou. E integrashon aki lo yuda pa resolvé diferente reto ku aktualmente e instansianan ta
enfrentá. Pa por realisá e trabou aki, minister Silvania a inkorporá e grupo di trabou yamá “Taakgroep
Herstructurering Geestelijke Gezondheidszorg”.
Proyekto ‘Di bo, pa bo, ku bo’
E proyekto aki tabatin komo meta pa stimulá pueblo pa limpia i tene nan propio bisindario limpi.
Ministerio di Salubridat, Medioambiente i Naturalesa a pone kònteinernan disponibel de diferente bario
pa asina pueblo por yega na e kònteinernan fásilmente i tene nan kas, kura i bario limpi. E resultadonan
tabata ku barionan a bira mas limpi, a eliminá diferente lokalidat ilegal di stòrt shushi, pueblo a bira mas
konsiente di resiklahe i separashon di shushi. Total a kolekta mas ku 2.5 mion kilo na shushi. Esaki a
kontribuí drástikamente na limpiesa di nos pais.

