Durante Conferencia “Innovative Future of Governance in Aruba”, PROME MINISTER HUNTO CU UNIVERSIDAD DI ARUBA A CELEBRA 15 AÑA DI FACULTAD OGM
Prome Minister Evelyn Wever-Croes:
Durante Conferencia “Innovative Future of Governance in Aruba”,
PROME MINISTER HUNTO CU UNIVERSIDAD DI ARUBA A CELEBRA 15 AÑA DI FACULTAD OGM
ORANJESTAD – Diamars anochi, 18 di februari, Prome Minister Evelyn Wever-Croes tawata invita pa e celebracion di 15 aniversario di e facultad di “Organization Governance Management” (OGM), di Universidad di Aruba.
E celebracion aki a tuma luga durante e Conferencia “Innovative Future of Governance in Aruba”. Pa e ocasion aki Prome Minister di Aruba a duna un discurso elocuente indicando riba e importancia di e facultad aki pa pais Aruba.
15 aña di OGM ta e testimonio di e rol critico cu educacion, investigacion y innovacion ta hunga den forma e futuro di un gobernacion y sociedad. Durante e ultimo 15 añanan, e programa di OGM a forma lidernan, legisladornan y visionarionan cu a contribui significativamente na e desaroyo di Aruba su maneho.
Prome Minister a indica durante su discurso cu gobernacion den siglo 21 no ta solamente un asunto di administracion, sino ta trata di adaptacion, inclusion y transformacion digital. E mundo ta evolucionando lihe, impulsa pa tecnologia, globalisacion y cambio social y Aruba mester sigui innova pa sigura un gobernacion efectivo.
E transformacionnan ta sosodiendo den diferente area. Entre otro, e area di gobernacion digital y inteligente, manera e programa di E-Government cu ta simplifica servicionan y ta haci gobierno mas accesibel. Tambe e transformacion di e participacion y colaboracion di e ciudadano unda e futuro di gobernacion ta uno colaborativo. Un gobierno cu ta scucha, participa y crea solucionnan hunto cu e ciudadano, ta un gobierno cu lo prospera. Otro transformacion importante ta e siguridad cibernetico. Esaki pa motibo cu digitalisacion ta trece cu ne cu e siguridad cibernetico
ta bira critico.
“E facultad di OGM ta esencial pa prepara e siguiente generacion di lidernan y legisladornan. E conferencia ta reuni mentenan briyante, investigadornan y expertonan pa discuti e siguiente pasonan den gobernacion pa nos nacion. Mi ta encurasha boso tur pa adopta un mentalidad cu ta pensa den futuro, pa desafia normanan existente, y pa impulsa gobernacion adaptativo, inclusivo y innovativo.
Den nomber di e Gobierno di Aruba, mi ta manda mi palabranan di elogio na Universidad di Aruba y e facultad di OGM pa nan dedicacion na excelencia, sperando cu e conferencia aki stimula ideanan nobo, crea colaboracionnan significante y inspira e siguiente 15 añanan di innovacion den gobernacion”, Prome Minister a expresa na final di su discurso
