Entrada real di Gobièru ta menos kompará ku loke a keda presupuestá
Entrada real di Gobièru ta menos kompará ku
loke a keda presupuestá
MAN-PIN a tuma nota ku entrada(nan) real di Gobiernu na final di luna di yanuari
2025 tabata hopi menos kompará ku lokual tabata presupuestá, prinsipalmente
entrada di primanan sosial.
Entradanan total real di impuesto, primanan sosial i otro risibí tabata Naf 236.3
mion kontra presupuesto di Naf. 256.2 mion. Un diferensia di Naf 20 mion menos
risibí repartí entre un oumento di entrada di belasting di Naf 4.6 mion, bahada di
Naf. 0.8 mion riba erfpacht i huur di tereno i un bahada di Naf 23.7 mion di
primanan sosial. Konforme nos leinan di seguro sosial Gobiernu ta obligá di kubri
tur defisit di primanan sosial i komo tal e oumento di entrada di belasting di Naf.
4.6 mion no ta sufisiente na kubri e buraku di Naf. 23.7 mion di primanan sosial.
MAN-PIN ta preokupa ku e bahada drástiko di primanan sosial no opstante ku ta
e prome luna di aña 2025. E motibu(nan) prinsipal di MAN-PIN su preokupashon
pa lokual ta trata e retraso den primanan sosial ta e hecho ku entrada nan di
primanan sosial ta nesesario pa garantisá servisionan basiko na nos pueblo
manera entre otro, seguro di malesa, pagonan di penshun di behes i viudo
(AOV/AWW), kuido di nos grandi i otro aspektonan sosial.
Ademas Banko di Seguro Sosial (SVB) segun su ultimo informe ta pronostiká ku
na final di aña 2027 e ‘schommelfonds’ ta agotá lokual ta nifiká ku Gobiernu
banda di su kontribushon fiho mester perkurá pa duna kontribushon adishonal na
SVB, kual suma mester keda kubrí dor di presupuesto general di Pais Kòrsou.
Kontribushon adishonal foi presupuesto general di pais por tin komo
konsekuensia ku Gobiernu no por sigui kumpli ku tur su servisionan na nos
pueblo manera salubridat, enseñansa, seguridat ets.
MAN-PIN no kier krea ningun sustu den nos pueblo, pero si kier alertá nos
pueblo i prinsipalmente gobiernu di Kòrsou pa enbes di ta kana hunga San
Nikolas of Papa Noel ku plaka di tur pagadό di belasting pa atendé na un manera
serio e asuntunan di seguronan sosial di nos pueblo. Aki ta kos serio!
Suzy Römer
